Búgin Oralda Qazaqstan Respýblıkasy Ulttyq ulan jaýyngerleriniń arasynda voleıboldan Qazaqstan Respýblıkasynyń chempıonaty bastaldy, dep habarlaıdy Egemen.kz.
Atalǵan dodaǵa quqyqtyq tártip áskeriniń «Ońtústik» (Almaty q.), «Ortalyq» (Qaraǵandy q.), «Batys» (Oral q.) jáne «Shyǵys» (О́skemen q.) óńirlik qolbasshylyqtary men Ulttyq ulan Akademııasynyń (Petropavl q.), 5573 (Astana q.) jáne 6654 (Qarakemer kenti) áskerı bólimderiniń komandalary qatysady. Barlyǵy jeti komanda ózara baq synaýda.
Ulttyq ulan áskerı qyzmetshileri arasynda ótetin chempıonattyń maqsaty — áskerı qyzmetshilerdiń dene shynyqtyrý daıyndyǵy men sporttyq sheberligin arttyrý, salaýatty ómir saltyn nasıhattaý, oblystyq jáne respýblıkalyq chempıonattarǵa, quqyq qorǵaý organdary, IIM arnaýly jáne kúshtik qurylymdary, Qazaqstan Respýblıkasy Qarýly Kúshteri men shet elder arasyndaǵy jarystarǵa myqty sportshylardy irikteý.
Sporttyq jarystyń ashylý saltanatynda «Batys» óńirlik qolbasshylyǵynyń qolbasshysynyń orynbasary polkovnık Pavel Sıtnıkov sóz sóılep, qatysýshylarǵa sáttilik tilep, sportpen turaqty aınalysyp, salaýatty ómir saltyn ornyqtyrýdyń mańyzyn atap ótti.
Odan keıin minbege Oral qalasy ákiminiń orynbasary Nurjanov Mırbolat Saǵynǵalıuly kóterilip, áskerı qyzmetshilerdiń arasyndaǵy sportshylardyń sheberligin shyńdaý óte mańyzdy ekenin aıtty
Sondaı-aq aıtýly sharada Ulttyq ulannyń Dene daıyndyǵy jáne sport bóliminiń bastyǵy polkovnık Abıshev Satjan jáne «Dınamo» Dene shynyqtyrý sport qoǵamy tóraǵasynyń birinshi orynbasary zapastaǵy polkovnık Pavel Stavkın, Batys Qazaqstan oblysy dene shynyqtyrý jáne sport bóliminiń basshysy Dáýren Muqanovtar da sóz sóılep jarysqa qatysýshylarǵa sáttilik tiledi.
Oıyn alańyna alǵashqylardyń biri bolyp, «Batys» óńirlik qolbasshylyǵynyń komandasy men 5573 áskerı bóliminiń voleıbolshylary shyqty.
Jalpy jarystyń fınaldyq oıyny 23 aqpan kúni ótedi.
Týrnır jeńimpazyna kýbok, medaldar jáne baǵaly syılyqtar beriledi. Júldegerler men qatysýshylar da marapattalady.