Túrkııadaǵy jer silkinisinen beri bir aıǵa jýyq ýaqyt ótse de, zardap shekkenderdiń jaǵdaıy máz emes. Olar áli de gýmanıtarlyq kómekke muqtaj, dep habarlaıdy Egemen.kz Tengrinews.kz saıtyna silteme jasap.
Túrkııada bolǵan aýyr apattan keıin de birneshe ret jer silkindi. Malatıadaǵy jer asty dúmpýi kezinde adam shyǵyny bolyp, 100-den astam adam zardap shekti. Keıbir aımaqtarda 4-5 magnıtýdaǵy jer silkinisteri tirkelip jatyr.
Zilzala saldarynan qalalar qırap, myńdaǵan adam baspanasyz qaldy. Álem elderi járdemdesip jatqanymen, úısiz-kúısiz júrgenderdiń sany áli kóp. Osy oraıda qazaqstandyq qoǵam belsendileri «100 kıiz» naýqanyn jarııalap, baýyrlas elge baspana jetkizgen edi.
Túrkııada turatyn Gúlnısa Qasymova túrikterge qazaqtyń kıiz úıi áli de qajet deıdi.
«Men Túrkııanyń shyǵysyndaǵy Erzýrým qalasynda turamyn. Bizde áli jer silkinip jatyr. О́zderińiz biletindeı, Malatııada da 4-5 balldyq jer asty dúmpýi boldy. Qazirgi kezde Malatııa men Adyıaman turǵyndarynyń jaǵdaıy óte qıyn», dedi ol.
Onyń aıtýynsha, jergilikti turǵyndarǵa gýmanıtarlyq kómek jetispeıdi.
«Adyıaman qalasy qańyrap qaldy. Onda kóptegen adam qaza tapty. Malatııa mańyndaǵy aýylda bizdiń dostarymyz bar. Olar úıi qırap qalǵan soń, ózderi jasap alǵan shatyrda turyp jatqandaryn aıtty. Olarmen birge 40-qa jýyq otbasy bar. Qalaǵa jetý múmkin emes. О́ıtkeni jol ekige bólinip ketken. Adamdar qalaǵa kirýden qorqady, óıtkeni ǵımarattar áli qırap, adamdar qaza taýyp jatyr», dedi áıel.
Onyń aıtýynsha, zardap shekken turǵyndar qazaq kıiz úılerine muqtaj jáne qazaqstandyqtardan kıiz úılerdi Malatııa men Adyıamanǵa jiberýin surap jatyr.
«Meniń Qazaqstannan ekenimdi bilip, kıiz úılerdi tabýǵa kómektesýimdi ótindi. Adamdar dalada qaldy. Jańa týǵan náresteler, júkti áıelder bar. Olarǵa bizdiń kıiz úılerimiz kerek, kómektesińizdershi!», dedi Gúlnısa Qasymova