Ýrbanızasııa úderisiniń óse túsýi Pavlodarda mektep tapshylyǵyn týdyryp otyr. Ásirese oblys ortalyǵynda bul túıtkil aıqyn seziledi. «Jaıly mektep» ulttyq jobasy aıasynda óńirde 2025 jylǵa deıin jeti mektep salý kózdelgen.
Sońǵy jyldary Pavlodar qalasynyń «Ýsolka», «Dostyq» shaǵyn aýdandarynda kópqabatty turǵyn úıler ústi-ústine salynyp, bul aýmaqtardaǵy mektep oqýshylary úshin oryn tapshylyǵy qalyptasqan. Budan eki jyl buryn óńirdiń bilim berý basqarmasy jetispeýshilikti azaıtý úshin keıbir mektepterdi keńeıtý, endi birin jańadan salý jobalary josparda turǵanyn habarlaǵan bolatyn. Qala mektepteriniń deninde bala sany tym kóp, al jańasyn salýǵa qarajat joq. Onyń ústine jyl saıyn mektepke barýshylar sany turaqty túrde ósip keledi.
Memleket basshysy Qasym-Jomart Toqaevtyń bilim berýge qatysty tapsyrmalarynyń nátıjesinde bul salada seń qozǵalyp, másele sheshile bastady. 2023-2025 jyldary elimizde 401 zamanaýı mektep salý josparlanyp otyrǵany belgili. «Samruk-Kazyna Construction» AQ mektep qurylystarynyń biryńǵaı tapsyrys berýshisi retinde belgilendi. Kompanııa aldaǵy úsh jyl ishinde oblys ortalyǵyndaǵy «Dostyq», «Ýsolka», «Shyǵys» jáne «Jastar» shaǵyn aýdandarynyń árqaısysynda 1 200 oryndyq tórt jańa mektep salýdy jobalap otyr. Taǵy úsh bilim ordasynda, atap aıtqanda № 4, 22, 27 mektepterdiń janynan árqaısysy 1 200 oqýshyǵa arnalǵan jańa korpýstar salynady.
Qazirgi ýaqytta bir ǵana Pavlodar qalasynda 7 myń oqýshyǵa oryn tapshy. О́ńirlik bilim berý basqarmasynyń málimetine súıensek, 8 mektepte oqýshylar úsh aýysymmen oqıdy. Aýyldyq jerlerde de tozyp turǵan orta oqý oryndary bar. Jańadan turǵyzylatyn mektepterdiń barlyǵy biryńǵaı standartpen jobalanyp, zamanǵa saı jabdyqtalady. Bolashaq bilim oshaqtarynyń qurylysy aldaǵy aıdan qolǵa alynady dep kútilip otyr.
Oblys ákimi Asaıyn Baıhanov pen «Samruk-Kazyna Construction» AQ basqarma tóraǵasy Máýlen Aımanbetov «Jaıly mektep» jobasyn júzege asyrý boıynsha kezdesý ótkizip, arnaıy jer ýchaskelerin bólý, ınjenerlik kommýnıkasııalardy júrgizý, bolashaq mektepterdi joǵary jyldamdyqty ınternetpen qamtamasyz etý máselelerin pysyqtady. Ǵımarattardy salý kezinde jergilikti qurylys materıaldary men otandyq jabdyqtardy paıdalaný usynyldy. О́ńir basshysy jergilikti jaýapty mekemelerge qurylys júretin aýmaqtardaǵy jer telimderin ýaqytynda rásimdeýdi, syrtqy ınjenerlik jelilerdi jedeldetip tartýdy tapsyrdy.
Pavlodar oblysy