Toǵyzqumalaq – Ertis-Baıan óńirinde keńinen taralǵan oıyn. Ásirese oqýshylar arasynda asa tanymal. Jýyqta Ekibastuzda ótken týrnırde 100-den astam sportshy bas qosty.
Ekibastuz qalalyq «Otarqa» gazetiniń júldesi úshin jyl saıyn toǵyzqumalaqtan týrnır uıymdastyrylady. Áıtse de, bıylǵy jarystyń jóni bólek. Qazaqstannyń Qurmetti jýrnalısi, Ekibastuz qalalyq «Otarqa» gazetiniń alǵashqy redaktory Amankeldi Qańtarbaevtyń týǵanyna 80 jyl tolýyna oraılastyrylǵan dodada Pavlodar, Ekibastuz qalalarynan, Ertis, Baıanaýyl, Sharbaqty, Maı, Aqqýly jáne Ýspen aýdandarynan 100-den astam jas oıynshy baq synady.
«Ekibastuz daýysy» – aqparattyq ortalyǵy» JShS «Otarqa» gazetiniń qyzmetkeri, jýrnalıst Jasserik Jáleluly ómirden ótken ustazy Amankeldi aǵanyń qoǵamǵa sińirgen eńbegi, qaıratkerligi jaıly estelik aıtyp, tulǵa sonaý 1990-shy jyldary gazet júldesi úshin týrnır uıymdastyrýǵa bastamashy bolǵanyn atap ótti. Sodan beri atalǵan týrnırdi №1 BJSM jyl saıyn ótkizip júr. Bul jolǵy jarysqa Qańtarbaevtar áýleti men «Ekibastuz daýysy» – aqparattyq ortalyǵy» JShS demeýshi bolyp otyr.
Bir qyzyǵy, dástúrli dodanyń alǵashqy jyldarǵy týrnırlerine oqýshy shaǵynda qatysqan Ardaq Qanapashev pen Aqan Faızolla búginde eseıgen, jarysqa tóreshilik etip júr. Ekibastuzdaǵy №1 BJSM-de toǵyzqumalaq jattyqtyrýshysy retinde shákirtterin daıarlap jatyr. A.Qanapashevtyń shákirti Jámıla Baıaldasheva byltyr álem chempıonatynda rapıdten chempıon atanyp, bul úshin ustazyna Qazaqstan Respýblıkasynyń eńbek sińirgen jattyqtyrýshysy ataǵy berildi.
Pavlodar oblystyq Toǵyzqumalaq federasııasynyń vıse-prezıdenti Arystan Qapaev ulttyq oıynnyń serpindi damýyna mundaı týrnırlerdiń zor úles qosatynyn atap ótip, básekeni oblystyq jarysqa aınaldyrýǵa qoldaý kórsetetinin aıtty.
Doda 9, 11 jáne 13 jastaǵy uldar men qyzdar arasynda rapıd túrinen uıymdastyrylyp, ár jerden kelgen myqtylar jarystyń kórigin qyzdyrdy. Uldar arasynda eki- bastuzdyqtar Asanáli Serikov pen Ámir Naýryzǵalı jáne Pavlodar qalasynan kelgen Arnat Qaırıdenov jeńimpaz atansa, qyzdardan ekibastuzdyq Iаsmına Madanııatova men Mádına Seıitqazınovanyń, taǵy bir pavlodarlyq Iаsmına Qapsalıamovanyń baǵy jandy.
Pavlodar oblysy,
Ekibastuz qalasy