Voleıboldar «Pavlodar» erler klýby óz tarıhynda alǵash ret el chempıonatynyń jeńimpazy atandy. Fınalda Qazaqstannyń byltyrǵy úzdigi – «Atyraýdy» jeńip, jeńis toıyn toılady.
Belgili maman Igor Nıkolchenko jattyqtyratyn «Pavlodar» voleıbol klýby Pavlodardaǵy «Baıantaý» sport saraıynda ótken fınaldyq oıyndarda birneshe kezdesý ótkizip, altyn júlde úshin talasta «Atyraýmen» kezdesti. Aqtyq synda azýly qarsylaspen eki oıynnyń qorytyndysynda 10 partııa ótkizip, 3:2, 3:2 esebimen basym tústi. Sóıtip, altyn júldeni oljalap, jerlesterine tamasha syı jasady.
Bul – klýb tarıhyndaǵy alǵashqy altyn. Jarystyń negizgi bóligin úshinshi orynmen támamdaǵan jergilikti komanda pleı-offta Almatynyń «Býrevestnık» klýbyn jeńgen edi. Al «Atyraý» byltyrǵy Ulttyq lıganyń jeńimpazy bolǵandyqtan, sońǵy oıynnyń salmaǵy aýyr bolǵany túsinikti. Osylaısha, Qazaqstannyń voleıbol kartasynda Pavlodar qalasy chempıon bolǵan toǵyzynshy komanda retinde tirkeldi.
Týrnırdiń qola júldesi úshin bolǵan oıynda almatylyq «Býrevestnık» byltyrǵy jetistigin taǵy qaıtalap, júldegerler sapynan kórindi. «Taraz» ótken jylǵydaı júldesiz qaldy.
Kerekýdiń erler komandasy sóıtip, óz tarıhynda tuńǵysh ret eń joǵary jetistikke jetip otyr. Kezinde Pavlodardyń arýlarynan quralǵan «Pýls» klýby 1995 jyly, al «Ertis» komandasy 1997 jáne 1998 jyldary el birinshiliginde top jarǵan edi.
PAVLODAR