Almaty qalasy sanıtarlyq-epıdemıologııa ortalyǵyna kene shaǵyp alǵan 100-den astam bala kelip, tekserilgen, dep habarlaıdy Egemen.kz.
Almaty qalasy sanıtarlyq-epıdemıologııa baqylaý basqarmasy bastyǵynyń orynbasary Ásel Qalyqova bıyl epıdemııalyq maýsym bastalǵannan beri medısına uıymdarynyń qyzmetine kene shaqqan 182 adam, onyń ishinde 15 jasqa deıingi 100 bala júgingenin habarlady.
Ol barlyǵyna shuǵyl medısınalyq kómek kórsetilgenin, kenege qarsy ımmýnoglobýlın engizilgenin atap ótti. 2022 jyly kene borrelıozynyń 9 jaǵdaıy tirkelgen. Al osy jyly mundaı derek tirkelmegen.
«Kún jylynǵan soń kene ensefalıti jáne kene borrelıozy sııaqty juqpaly aýrýlardy tasymaldaıtyn keneler paıda bolady. Bul maýsym naýryzdan qazanǵa deıin jalǵasady. Keneler mamyr, maýsym aılarynda tipti kóbeıip ketedi», dedi Ásel Qalyqova.
Kene borrelıozyn emdeý tek juqpaly aýrýlar aýrýhanasynda júrgizilýi kerek. Emdelmegen jaǵdaıda aýrý asqynyp jáne sozylmaly aýrýǵa aınalyp, keıbir jaǵdaılarda júıke júıesi men býyndardyń zaqymdanýynan múgedektikke ákeledi.
Kene borrelıozynyń aldyn alýdyń birden-bir joly - kene shaǵýdan qorǵaný. Serýendeýge, saıajaıǵa nemese ormandy aýmaqqa barǵanda keıbir erejelerdi saqtaý mańyzdy:
jabyq kıim kııý kerek. Keneler kórinetindeı, deneni múmkindiginshe jaýyp, kenelerden qorǵap - shalbardy etikke, shulyqqa, kıimniń joǵarǵy bóligin shalbarǵa salý kerek. Kóılekke, kúrteshege tigilgen kúlápara kııý nemese shashty oramaldyń, bas kıimniń astyna baılaǵan jón; orman alqaptarynda serýendeýge, joldarmen júrýge jáne bıik shópter men butalardan aýlaq bolý kerek; kenelerdi úrkitetin zattardy - repellentterdi qoldaný qajet. kıimdi, deneni jáne zattardy jıi tekserip, úıge oralǵanda da keneniń bar-joǵyn tekserip alý kerek.