Qabdykárim ulyqtalǵan kesh

«Án súımegen ómirdi de súımeıdi, ózim joqta ánim júrsin qulaqta» degen aqyn Qabdykárim Ydyrysovtyń jyrlary halyq júreginen tereń oryn aldy. Belgili ǵalym Tursyn Jurtbaı atap ótkendeı, «О́leń ólkesindegi ártúrli áýenniń arasynan Qabdykárim Ydyrysovtyń óz úni erekshe estiledi. Aqyn shyǵarmasyn tutas­taı tu­jy­rymdaǵandaǵy baıqa­latyn basty daralyq – patrıottyq rýh jáne qazaq halqynyń ozyq dástúrine degen qurmet».

Aqyn elimizdiń talaı jerin aralap júrip, ár­qaı­sysynyń sulýlyǵyn jyrǵa qosqan. Sonyń ishinde Ar­qa dalasynyń jer jánnaty – Baıanaýyl jurtynyń ánuranyna aınalǵan «Baıan­aýyl valsi» ániniń jazylý tarıhy da aıryqsha. 1962 jyly Baıanaýylda jazýshy Zeıin Shashkınniń 50 jyldyǵy atalyp ótedi. Sol toıda aqyn Qabdykárim Ydyrysov ortaǵa shyǵyp bir óleńin oqıdy. О́leńde Baıanaýyldyń tabıǵaty men ereksheligi ádemi beınelengen. Mar­­jandaı tizilgen ásem sóz jınalǵandardy selt etkizdi. Sol arada ataqty kompozıtor, kúıshi Nurǵısa Tilendıevtiń óleńge yntasy aýyp, án jazýǵa bekinedi.

Konserttik keshte aqyn­nyń óleńderine ja­zylǵan tanymal ánder shyr­qal­dy. Bir ereksheligi, bar­lyq ándi súıemeldegen Rús­tembek Omarov atyn­daǵy qazaq ult aspaptar or­­kestri­ne qalamgerdiń ne­me­resi, respýblıkalyq konkýrs­tar­dyń laýreaty Álıhan Ydyrysov dırı­jerlik etti. Ádemi kesh­tiń shymyldyǵyn Túr­kesh­­tiń «Kó­ńilashar» kúıi­men ash­qan ónerpazdar bu­dan soń tyńdarmannyń qu­laq quryshyn qandyrǵan án men kúıdi kezegimen túı­dektetti. Aqynnyń orysshadan aýdarǵan «Árqashan kún sónbesin», ánin kompozıtor Kenjebek Kúmisbekov jazǵan «Qarqaralym», «Jumbaqbaı ataıdyń áni», «Týǵan el», «Kelshi, kelshi, balashym», «Qazaqstanym meniń» án­deri shyrqaldy. Dostyq án­uranyna aınalǵan áıgili «Qaıdasyńdar, dostarym» áni de tyńdarmandy elitti.

Qabdykárimtanýshy, jýr­­nalıst Nurbol Ja­ıyq­baev­tyń aıtýynsha, 1978 jyly aqyn Ja­zýshylar odaǵynyń bas­shylyǵy atynan Pavlodar óńirindegi mereıtoılyq is-sharalarǵa qatysqanda, onymen birge lırık aqyn Saǵı Jıenbaev, ataqty kompozıtor Áset Beıseýov birge júripti. Osy saparda Áset Beıseýov Q.Ydy­rysovtyń sózine «Tý­ǵan qalam – Pavlodarym» atty án jazǵany týraly derek bar. Kóp ýaqyt boıy eleýsiz qalǵan bul án de sahna tórinde oryndaldy.

PAVLODAR