Fashızmge qarsy soǵysta jeńisti jaqyndata túsýge sebepker bolǵan qazaqtyń has batyrlarynyń biri, kerekýlik Serikbaı Mútkenovtiń týǵanyna bıyl 110 jyl toldy. Nebári 23 jyldyq ǵumyrynda erliktiń eren úlgisin kórsetken qaharmannyń esimin jerlesteri ulyqtap, Jeńis kúnine oraı týǵan jerinde ulan-asyr toı ótkizdi.
Serikbaı Mútkenov 1913 jyly qazirgi Pavlodar oblysynyń Aqtoǵaı aýdanynda dúnıege kelgen. Eńbekke erte aralasyp, Pavlodar pedýchılıshesin támamdaǵan soń, aýylda bala oqyta bastaıdy. Soǵys bastalǵan jyldary Ertis aýdanyndaǵy Qaraqudyq aýylynda muǵalimdik qyzmet atqarǵan. Soǵys oty órship turǵan ýaqytta aýdandyq komıssarıatqa baryp, maıdanǵa óz erkimen attanýǵa ótinish jazady. Sóıtip, 1942 jyldyń qańtarynda qyzyl ásker qataryna shaqyrylyp, batareıanyń komandıri bolady. 1943 jyly keńes áskeri Dneprden ótý kezinde fashısterdiń qatty qarsylyǵyna tap bolǵany belgili. Sol tusta ol erligimen kózge túsedi. Jaýdyń 40-qa jýyq jaýyngeriniń kózin joıyp, óz batalonyna ári qaraı júrý úshin jol ashty. Alaıda dańqty jerlesimizge óz qarýlastarymen birge Jeńis kúnin kórý baqyty buıyrmady. 1944 jyly 15 qańtarda erlikpen qaza taýyp, sol jyldyń 9 aqpanynda KSRO Joǵarǵy Keńesi Prezıdıýmynyń Jarlyǵymen aǵa serjant Serikbaı Mútkenovke Keńes Odaǵynyń Batyry ataǵy beriledi.
Týystarynyń aıtýynsha, Serikbaı Mútkenov atamyz aqynjandy azamat bolǵan. Alapat maıdanda júrse de, jubaıy Oryntaıǵa, týystaryna óleńmen hat joldap otyrǵan eken. Búginde batyrdyń esimin máńgi este saqtaý maqsatynda Aqtoǵaı aýdanyndaǵy aýylǵa, jergilikti mektepke jáne oblys ortalyǵy men Aqtoǵaı aýylyndaǵy kóshelerge esimi berilgen.
Mútkenov aýylynda ótken batyrdyń 110 jyldyq mereıtoıynda 14 kıiz úı tigilip, aýyl mańynda ulttyq sport túrlerinen oblystyq deńgeıde jarystar uıymdastyryldy. Toıǵa jınalǵan jurtshylyq eń áýeli Mútkenov orta mektebindegi batyrdyń bıýsti janynda ótken saltanatty jıynǵa qatysyp, bilim ordasyndaǵy murajaıdy tamashalady. Aqtoǵaı aýdanynyń ákimi Qarshyǵa Arynov, batyrdyń jaqyn týysy Balǵabek Álejanov, aýdannyń qurmetti azamatty Oljabaı Aralov dańqty jerlesimizdiń erlik isteri men onyń esimin jas urpaqqa nasıhattaý maqsatynda júzege asyp jatqan ıgi is-sharalar jaıynda áńgimeledi.
Aıtyp óteıik, Jeńistiń 63 jyldyǵyna oraı Ýkraınadaǵy Rızıno eldi mekeninde Serikbaı Mútkenovke granıtti eskertkish ornatylyp, ashylýyna Pavlodar oblysy patrıottyq ekspedısııa ókilderi qatysty. Al 2020 jyly týǵan aýdany ortalyǵynda bıýst qoıyldy.
Pavlodar oblysy