Osy jyldyń 4 aıynda el ekonomıkasy 5 paıyzǵa ósti. Bul týraly Úkimet otyrysynda Ulttyq ekonomıka mınıstri Álibek Qýantyrov aıtty, dep habarlaıdy Egemen.kz.
«Bıyl 4 aıda ótken jyldyń qańtar-sáýirimen salystyrǵanda Qazaqstan ekonomıkasy 5 paıyzǵa ósti. Onyń ishinde naqty sektordaǵy ósý - 4,8, al qyzmet kórsetý salasyndaǵy ósý 4,9 paıyzdy qurady. Negizgi salalardyń barlyǵynda oń dınamıka baıqalyp otyr. Ásirese qurylys, saýda, sondaı-aq aqparat jáne baılanys eń joǵary ósimdi kórsetti», dedi Álibek Qýantyrov.
Onyń atap ótýinshe, negizgi kapıtalǵa salynǵan ınvestısııalardyń ósý qarqyny 18 paıyzdy qurady.
«Investısııa aǵyny kólik jáne qoımalaýda – 39,3, aýyl sharýashylyǵynda – 26,5, jyljymaıtyn múlikke qatysty operasııalarda – 10, sondaı-aq ónerkásipte – 18,1, onyń ishinde taý-ken óndirý ónerkásibinde – 17,3 jáne óńdeý ónerkásibinde - 7 paıyzǵa ósti. О́ńirler arasynda eń joǵarǵy ósim Túrkistan, Mańǵystaý, Qyzylorda jáne Batys Qazaqstan oblystarynda baıqaldy», dedi mınıstr.