Búgin Úkimet otyrysynda Qarjy mınıstri Erulan Jamaýbaev respýblıkalyq bıýdjettiń atqarylý deńgeıi týraly aıtty, dep habarlaıdy Egemen.kz.
Mınıstrdiń aıtýynsha, memlekettik bıýdjet shyǵysy 98,6%, respýblıkalyq bıýdjet shyǵysy 99,0%, jergilikti bıýdjetter shyǵysy 98,6% atqarylǵan. Respýblıkalyq bıýdjettiń shyǵysy 7 trln teńgeni qurady. Al atqarylmaǵan soma - 72 mıllıard teńge. Onyń ishinde 16 mıllıard teńge únemdeldi. Igerilmegeni - 55 mlrd teńge.
Sondaı-aq ol bıýdjet qarjysyn ıgere almaǵan mınıstrlikterdi atady.
«Mádenıet jáne sport, aqparat jáne qoǵamdyq damý, ekologııa jáne tabıǵı resýrstar, sıfrlyq damý, ınnovasııalar jáne aeroǵarysh ónerkásibi mınıstrlikteri bıýdjet qarjysyn tolyq ıgermegen», dedi Erulan Jamaýbaev.
Onyń aıtýynsha, bıýdjet qarjysy memlekettik satyp alý konkýrstarynyń uzaq ótkizilýi, oryndalǵan jumystardyń aktileri men shot-faktýralardyń ýaqtyly usynylmaýy syndy sebeptermen ıgerilmegen bolýy múmkin.
«Jergilikti bıýdjetterdiń shyǵysy 3,3 trln teńge boldy. Atqarylmaǵany - 47 mlrd teńge. Bıyl óńirlerge 2 trln teńgege jýyq nysanaly transfertter kózdelgen. Olarǵa 1 mamyrǵa 473 mlrd teńge bólindi. Onyń 97%-y ıgerildi. Al ıgerilmegeni – 14 mlrd teńge. Bul rette Astana jáne Almaty qalalary, Atyraý jáne Túrkistan oblystary qarjyny tolyq ıgermegen», dedi Qarjy mınıstri.