Aqtóbedegi 66/55 áskerı bóliminde boryshyn ótep júrgen 24 jastaǵy sarbaz qazir oblystyq psıhıkalyq densaýlyq ortalyǵynda em qabyldap jatyr, dep habarlaıdy Egemen.kz.
Qazirgi ýaqytta 66/55 áskerı bóliminde bolǵan jaǵdaıǵa qatysty jan-jaqty zertteý jumystary júrgizilip jatyr.
Minez-qulqy ózgeshe jigit ortalyqta em qabyldaýyn jalǵastyrady.
«66/55 áskerı bóliminiń sarbazy bizde em qabyldap jatyr. Ata-anasynyń aıtýynsha, ol burynnan tuıyq, kópshilik ortany unatpaıtyn. Shynymen de, jigit ortasymen aralaspaıdy, minez-qulqy da ózgeshe. Osyǵan baılanysty ony úıine qaıtarý úshin tıisti akt toltyryp beremiz. Ony ǵylymda «sosıofobııa» dep ataıdy. Ol sarbaz, tipti, kópshilikpen birge tamaq ta ishpegen. О́zge aqparatty bere almaımyz. Qupııa bolyp esepteledi», dedi oblystyq psıhıkalyq ortalyq bas dárigeriniń orynbasary G.Ýrazova.
QR Ulttyq ulan «Batys» óńirlik qolbasshylyǵynyń baspasóz qyzmeti osy oqıǵaǵa qatysty túsinikteme berdi.
Jas jigit áskerı qyzmetke kelgen kúnnen bastap eshkimmen aralaspaǵan, ózgelerden jat júrgen.
Ońtústik óńiriniń týmasy ata-anasymen habarlasqan kezde de sózge óte sarań bolǵan. Suraqqa bir sózben ǵana jaýap bergen eken.
«Áskerı bólimdegi psıhologtyń baqylaýy barysynda jaýyngerlik, dene daıyndyǵy sabaqtarynan bas tartyp, áskerı qyzmetke óz erkimen kelmegenin aıtqan. Ári qaraı da áskerı boryshyn ótegisi kelmeıtinin jetkizgen. Suhbat kezinde sarbaz psıhologııalyq aýytqýy bar ekenin aıtyp, ózin psıhıatr dárigerge qaratýyn ótingen. Psıhokorreksııalyq jumys pen jeke áńgime kezinde áskerı qyzmetshiniń jaǵdaıy jaqsarmady. Osyǵan baılanysty №3 qalalyq emhanasynyń psıhıatryna konsýltasııaǵa jiberildi. Psıhıatr qarap, áskerı qyzmetshini tekserý jáne emdeý úshin oblystyq psıhıkalyq densaýlyq ortalyǵyna jiberý týraly sheshim qabyldady. Bıyl ol 19 sáýirde «beıimdelýdiń buzylýy» degen dıagnozben aýrýhanaǵa jatqyzyldy. Sol sátten bastap aýrýhanada em alyp jatyr. Qazirgi tańda áskerı qyzmetke jaramdylyǵyn tekserý úshin áskerı medısınalyq komıssııadan ótkizý josparlanyp otyr», dep habarlady vedomstvonyń baspasóz qyzmeti.