Astanadaǵy Ulttyq mýzeıge kelýshiler kóne Otyrar shaharynan tabylǵan shyraǵdanǵa qyzyǵa qarap, onyń tarıhyn bilýge qumartyp turady.
Bul buıym Otyrardyń qysh sheberhanasynda jasalǵan. Qaı ǵasyrǵa tán ekeni belgisiz. Biraq onyń syrtqy beınesinen kóne jádiger ekenin baıqaısyz. Shyraǵdannyń syrty aq tústi angobpen kómkerilip, kók tústi boıaýmen órnektelgen. Tuǵyrdyń tómengi jáne joǵarǵy bóliginde kóldeneńinen eki qatar qytaı ıeroglıfine uqsas órnekter, ortańǵy bóliginde eki aıdahar beınelengen. Tuǵyry trapesııa pishindi, qımasy dóńgelek, tabanynyń ishki jaǵy qýys, erneýi ishke, syrtqa qaraı doǵaldana qaıyrylǵan, jıegi tolqyn tárizdi. Astyńǵy bóliginiń dıametri – 19 sm, bıiktigi – 27 sm. Tuǵyrdyń ústińgi ortalyq alańynda shyraq ornalasqan.
Otyrar – qazaq jerindegi ǵana emes, Ortalyq Azııadaǵy baıyrǵy shaharlardyń biri. Tarıhı derekterde adamdar onda V ǵasyrdan bastap turǵandyǵy aıtylady. Bul kezeńde qala «Farab» dep atalǵan. Ol da tegin emes. Áıgili ǵalym, oıshyl Ábý Nasyr ál-Farabı babamyz osynda ómirge kelgen. Sondaı-aq Uly Jibek jolynyń kerýenderi osy qalany basyp ótken. Arab ǵalymdary óz eńbekterinde Otyrardy Ortalyq Azııadaǵy saýda men mádenıeti damyǵan shahar dep baǵalaǵan.