Parlament Májilisiniń depýtaty Ashat Aımaǵambetov áleýmettik jelidegi paraqshasynda memlekettik grantqa ilikpeı qalǵan talapkerlerge keńes berdi, dep habarlaıdy Egemen.kz.
«Kommentterde jáne jekeme de osyndaı suraq kóp qoıylyp jatyr. Sondyqtan qysqasha óz oıymdy jazaıyn. Bastysy áli de grantty jeńip alýǵa múmkindik bar. Nege?
Birinshiden, ıgerilmegen birneshe myń grant qaıtadan úlestiriledi. Iаǵnı grant alǵan talapkerlerden keıin turǵan talapkerlerge UBT-da jınaǵan upaı sanyna sáıkes beriledi. Sony kútýge bolady.
Ekinshiden, ákimdikterdiń granttary bar. Birneshe myń grant jergilikti bıýdjetten bólinedi.
Úshinshiden, «Qazaqstan halqyna» qorynyń granttary taǵy bar.
Tórtinshiden, keıbir talapkerler túrli sebep boıynsha jeńip alǵan granttarynan bas tartady. Olardyń sany da az bolmaıdy. Ol granttar da qaıta taǵaıyndalady.
Besinshiden, tipti eshteńe bolmasa, ýnıversıtetke aqyly túrde túsip, keıin jaqsy oqyp, GPA joǵary bolsa, bilim alý kezinde bosaǵan bos grantty utyp alýǵa bolady.
Altynshydan, «gap year»alyp bir jyl daıyndalyp qaıtadan UBT tapsyryp grantty jeńip alýǵa bolady. Ol meniń óz basymnan ótken oqıǵa. Bul da jaqsy sheshim.
Jetinshiden, kolledjge túsýge bolady. Kolledjde grant kóp, qajetti mamandyqtar boıynsha kolledj bitirgender naryqta tapshy. Kerek bolsa, birazdan keıin ári qaraı JOOǵa túsip, qysqa merzimde joǵary bilim alyp shyǵýǵa da bolady.
Kórip otyrǵandaryńyzdaı múmkindikter óte kóp. Bári áli alda. Tolyq málimet alý úshin ýnıversıtetterdiń qabyldaý komıssııasyna jolyǵý kerek›, dep jazdy Ashat Aımaǵambetov.