QR Mádenıet jáne sport mınıstrliginiń qoldaýymen Abaı kúni merekesine oraı Ulttyq mýzeı qoryna uly aqyn qoldanǵan «Týla» samaýrynyn tabys etý rásimi ótti, dep habarlaıdy Egemen.kz.
Tarıhı qundylyǵy joǵary sanalynatyn samaýryn 1893 jyly jasalǵan eken. Atalmysh jádiger Abaı atyndaǵy halyqaralyq mádenıet pen ónerdi qoldaý qory atynan Ulttyq mýzeıge berilip otyr. Abaı Qunanbaıuly bastaǵan qazaq zııalylary shaı ishken sol samaýryn – Semeı qalasyndaǵy mesenat Bekbaı Baısovtyń kerýen saraıynda turǵan eken.
QR Mádenıet jáne sport vıse-mınıstri Arman Júdebaev oıshyldyń ómiri men shyǵarmashylyǵy áli de tolyq zerttelmedi deı kele, Abaıdyń qazaq rýhanııatyna qosqan aıryqsha úlesi týraly sóz qozǵady.
Osy kúnderi Ulttyq mýzeı qorynda Abaı Qunanbaıulyna qatysty 42 jádiger saqtalyp tur. Jádigerlerdiń arasynda aqynnyń jeke qoldanǵan qutysy, tiri kezinde baspadan shyqqan kitaptary jáne taǵy basqa mańyzdy dúnıeler bar.