Shahtınsk qalasy – Qaraǵandy oblysynyń iri ónerkásiptik aýdandarynyń biri. Shahardyń elektr energııasyn zaman aǵymyna saı taratýda tıisti kásiporyndarynyń alar orny aıtarlyqtaı. «Shahtınskteploenergo» jaýapkershiligi shekteýli seriktestigi – Shahtınsk qalasyn jylýmen jabdyqtaıtyn jalǵyz qaınar kózi. Jylý elektr ortalyǵy qoldanysqa 1964 jyly tapsyrylǵan. Qazirgi ýaqytta jylytý kezeńine daıyndyq aıasynda jóndeý jumystary júrgizilip jatyr.
«Bekitilgen ınvestısııalyq baǵdarlamaǵa sáıkes bıyl Indýstrıalnaıa kóshesi boıyndaǵy kirpish zaýyty aýdanyndaǵy magıstraldyq qubyr ýchaskesin qosymsha qun salyǵynsyz 23 mln teńge somasyna jańalaý jumysy josparlandy. Saraptaý amaldary kezinde Molodejnaıa kóshesiniń boıyndaǵy magıstraldyq qubyrlardyń tozyǵy jetkeni anyqtaldy. Aldaǵy ýaqytta oqys oqıǵalardyń aldyn alý maqsatynda qubyrlardy aýystyrý sharalary jedel túrde qolǵa alyndy. Merdiger – «Bolashak Build Company» kompanııasy tarapynan Tabıǵı monopolııalardy retteý komıtetine ınvestısııalyq baǵdarlamaǵa tıisti ózgertý engizýge ótinim joldady. Komıtet usynysty qarastyryp jatyr», deıdi «Shahtınskteploenergo» JShS dırektory Murat Álimov.
Shahardaǵy jalǵyz jylý kompanııasy 250 kópqabatty turǵyn úıdi, 25 áleýmettik nysandy, 17 bilim nysanyn, tórt medısınalyq mekemeni, úsh mádenıet jáne bir sport nysanyn jylýmen qamtıdy. Onymen qosa, 15 ákimshilik nysan bar.
«Investısııalarǵa aıyrbastaý tarıfi» memlekettik baǵdarlamasy sheńberinde ınvestbaǵdarlamaǵa bıýdjet qarajaty esebinen oryndalatyn jáne tarıftiń shamasyna áser etpeıtin jalpy somasy 77 mıllıon teńgege 536 metr jylý jelilerin aýystyrý boıynsha qosymsha is-sharalar engizilgen edi. Memlekettik satyp alý qorytyndysy boıynsha merdigerlermen tıisti kelisimsharttar jasalyp, jumystar kestege sáıkes júrgizilip jatyr.
Investısııalyq baǵdarlamanyń barlyq is-sharasy Shahtınsk qalasynyń turǵyndary men kásiporyndaryn jylý energııasymen turaqty qamtamasyz etýge baǵyttalǵany belgili. Bul rette keshendi atqarylyp jatqan jumystardyń bir bóligi qalanyń tynys-tirshiligin qoldaý úshin erekshe mańyzdy.
Tabıǵı monopolııalardy retteý komıtetiniń Qaraǵandy oblysy boıynsha departamenti uıytqy bolǵan baspasóz týryna qatysýshylar Jeńistiń 40 jyldyǵy men K.Marks kóshesine deıingi magıstraldyq qubyrlardy jańalaý boıynsha oryndalǵan jumys barysymen tanysyp, jylytý maýsymyna daıarlyq deńgeıine kóz jetkizdi. Issapar barysynda BAQ ókilderi kompanııa qyzmetine, sondaı-aq kásiporynnyń jumys josparyn ýaqtyly ári sapaly oryndaýǵa qatysty saýaldaryn joldap, quzyrly mekemeler ókilderinen tıisti jaýap aldy.
Qaraǵandy oblysy