Shymkent qalasynyń Ál-Farabı aýdany ákimdiginiń laýazymdy tulǵasy bıýdjet qarajatyn asa iri mólsherde jymqyrdy degen kúdikpen ustaldy. Atalǵan isti Qarjy monıtorıng agenttiginiń aýmaqtyq departamenti tergep jatyr, dep habarlaıdy Egemen.kz.
«Kúdikti óziniń laýazymdyq jaǵdaıyn paıdalana otyryp, qala aýmaǵyndaǵy kópqabatty úılerdiń 150 aýlasyn abattandyrý boıynsha smetalyq qujattamada jumystar men materıaldardyń baǵasyn negizsiz qymbattatqan. Ol 700 mln teńgeden astam somaǵa asa iri mólsherde bıýdjet qarajatyn jymqyrdy degen kúdikke ilindi», delingen vedomstvo habarlamasynda.
Sot sanksııasymen atalǵan azamat ustalyp, qamaýǵa alyndy.
QR QPK-niń 201-babyna sáıkes ózge aqparat jarııa etýge jatpaıdy.