Prezıdent Qasym-Jomart Toqaevtyń Respýblıkalyq pedagogter sezindegi baıandamasy bastaldy, dep habarlaıdy Egemen.kz Aqordanyń baspasóz qyzmetine silteme jasap.
Prezıdent sóz basynda elimizdiń qadirli ustazdaryn tól merekelerimen quttyqtady.
«Barshańyzdy Respýblıkalyq pedagogter seziniń ashylýymen quttyqtaımyn. Ustazdar kúni qutty bolsyn! Búgin, shyn máninde, óte mańyzdy jıyn. Sebebi ustaz – eń aldymen, qadirli maman. Al, ustaz bolý – qasterli mindet», dedi Memleket basshysy.
Búginde elimizdiń bolashaǵy jarqyn bolyp, damyǵan memleketke aınalýy úshin muǵalimder qaýymy aıanbaı eńbek etip júr. Jalpy, kim-kimniń de jaqsy adam, myqty maman bolýy ustazyna baılanysty.
«Ahmet Baıtursynuly «Biz eldi túzeýdi bala oqytý isin túzeýden bastaýymyz kerek» degen. Ult ustazynyń bul sózi qashanda oryndy. Bilim men ǵylym – tabysqa jetýdiń eń basty kilti. О́skeleń urpaqqa taǵylymdy tárbıe jáne ozyq bilim berý – óte mańyzdy mindet», dedi Q.Toqaev.
Prezıdenttiń bastamasymen 2019 jyly «Pedagog mártebesi týraly» jeke zań qabyldandy. Sońǵy tórt jylda ustazdardyń jalaqysy 2 ese ósti. Jaqynda balabaqsha tárbıeshileriniń aılyǵy 30 paıyzǵa kóbeıdi. Ustazdardyń eńbek demalysy uzartyldy.
«Muǵalimniń mindetine kirmeıtin artyq jumystyń bári alynyp tastaldy. Ustazdardyń kásibı biliktiligin arttyrý máselesine basa mán berilip jatyr. «Bolashaq» baǵdarlamasymen úsh jylda 220-ǵa jýyq pedagog shetelde oqyp keldi. Muǵalim mamandyǵyn tańdaǵan jastarǵa qoıylatyn talap kúsheıdi. Osy saladaǵy stýdentterdiń stıpendııasy 2,5 ese kóbeıdi. Bir sózben aıtqanda, biz, eń aldymen, bilikti ustaz daıarlaý isine aıryqsha mán berip otyrmyz», dedi Prezıdent óz baıandamasynda.