15 qazanda saǵat 10:40-ta Jaıyq-Kaspıı oblysaralyq basseındik balyq sharýashylyǵy ınspeksııasynyń Mańǵystaý oblysy boıynsha balyq ınspeksııasy basqarmasy qyzmetkerleri Kaspıı teńiziniń jaǵalaýyna monıtorıng júrgizý barysynda Túpqaraǵan aýdanynda Baýtıno aýylynyń mańynda 25 óli ıtbalyq ushasy men 33 dana bekire tuqymdas balyqtardy tapqan.
Aıta ketsek, tabylǵan teńiz janýarlary men balyqtardyń ólekseleriniń ár túrli dárejede ydyraýy olardyń ólim mezetteri ár ýaqytta bolǵandyǵyn kórsetedi.
Balyq sharýashylyǵy komıtetiniń málimetinshe qoldanystaǵy ózara is-qımyl shemasyna sáıkes, atalǵan fakt týraly jumys tobynyń barlyq músheleri (jergilikti atqarýshy organdar, mamandandyrylǵan ǵylymı uıymdar, Kaspıı ıtbalyǵyn zertteý jáne ońaltý ortalyǵy, Gıdrobıologııa jáne ekologııa ınstıtýty, Qazaqstandyq qoldanbaly ekologııa agenttigi, Mıkrobıologııa jáne vırýsologııa ǵylymı-óndiristik ortalyǵy, oblystyń veterınarııalyq qyzmeti, ekologııa jáne polısııa departamentteri, tabıǵatty qorǵaý prokýratýrasy) habardar etilgen.
Itbalyq tabylǵan jerdegi jumys tobyn Jaıyq-Kaspıı oblysaralyq balyq sharýashylyǵy basseındik ınspeksııasy basshysynyń orynbasary basqarady. Qazirgi ýaqytta jumys tobynyń qalǵan músheleri sý, aýa, topyraq synamalaryn alý úshin jáne múmkin bolsa, óli janýarlar men balyqtardyń tinderinen synamalar alý úshin keletini kútilip otyr.
Sırek kezdesetin jáne quryp ketý qaýpi tóngen janýarlar túrleriniń joıylý deregi boıynsha qylmystyq is qozǵaldy.
Qazaqstannyń qoldanbaly ekologııa agenttiginiń qyzmetkerleri Kaspıı teńiziniń Qazaqstan jáne Reseı sektorlarynyń akvatorııasyndaǵy reseılik ǵylymı mekemelermen birlesip 2022 jyldyń aıaǵy men 2023 jyldyń basyndaǵy qysqy kezeńde ıtbalyqtardyń shoǵyrlanýy kezeńinde júrgizgen sanaý qorytyndysy boıynsha eseptelgen ıtbalyqtardyń jalpy sany 259 872 quraǵan. (Kaspıı teńiziniń Qazaqstan sektorynda - 240 168, Reseı sektorynda - 19 704).