Májiliste ótken «Amanat» partııasy fraksııasynyń keńeıtilgen jıynynda depýtattar «2024-2026 jyldarǵa arnalǵan respýblıkalyq bıýdjet týraly» jáne «Qazaqstan Respýblıkasynyń Ulttyq qorynan 2024-2026 jyldarǵa arnalǵan kepildendirilgen transfert týraly» zań jobalaryn qarady.
Zań jobalarynda Prezıdenttiń Joldaýyn jáne Saılaýaldy baǵdarlamasyn, sondaı-aq partııanyń saılaýaldy baǵdarlamasyn iske asyrý eskerildi. Depýtattar jıyndy Kostenko atyndaǵy shahtada qaza tapqan kenshilerdi bir mınýt únsizdikpen eske alýmen bastady.
Otyrysty ashqan fraksııa jetekshisi Elnur Beısenbaev depýtattar memlekettiń halyq aldyndaǵy áleýmettik mindettemelerin, onyń ishinde jalaqy men zeınetaqyny ındeksteý, járdemaqylardy kóbeıtý, medısınalyq kómekti qamtamasyz etý sııaqty basqa da basymdyqtardy oryndaýǵa erekshe nazar aýdarǵanyn atap ótti.
Budan soń sóz alǵan Premer-mınıstrdiń orynbasary – Qarjy mınıstri Erulan Jamaýbaev respýblıkalyq bıýdjettiń 2024 jylǵa arnalǵan shyǵystary 24 trln teńge deńgeıinde dep boljanyp otyrǵanyn jetkizdi. Transfertterdi esepke almaǵanda kirister kólemi 16,1 trln teńge bolady dep josparlanyp otyr.
«Bıýdjet jobasy Memleket basshysynyń Joldaýyn jáne Saılaýaldy baǵdarlamasyn, sondaı-aq partııanyń saılaýaldy baǵdarlamasyn oryndaý jónindegi Jol kartasyn iske asyrýdy eskere otyryp jasaldy. Bul jumys Úkimettiń erekshe baqylaýynda tur. Májilismenderdiń tikeleı aralasýymen 2,4 trln teńgege jýyq qarajat mańyzdylyǵyna qaraı qaıta qarastyryldy. Bul óte tyńǵylyqty ári júıeli jumys boldy. О́ńirlerdi damytýǵa 2024-2026 jyldarǵa 7 trln teńge qarastyrylǵan», dedi vıse-premer.
Erulan Jamaýbaev budan basqa «Aýylda densaýlyq saqtaýdy jańǵyrtý» ulttyq jobasyn iske asyrýǵa 2,4 trln teńge qarastyrylǵanyn, 2025 jylǵa deıin 655 densaýlyq saqtaý nysanyn salý jáne 32 aýdanaralyq aýrýhanany jańǵyrtý josparlanǵanyn aıtty. «Jaıly mektep» ulttyq jobasyna 1,7 trln teńge baǵyttalyp, bul aqsha 369 mekteptiń qurylysyna jumsalady.
Májilis depýtaty, fraksııa múshesi Marhabat Jaıymbetov bıýdjet jobasyn ázirleý barysynda halyq qalaýlylary memlekettik organdardan qosymsha málimetter alý úshin 200-den astam saýal joldaǵanyn jetkizdi. Sondaı-aq depýtattar 300-ge jýyq túzetý engizip, bul bıýdjettiń shyǵys bóligin 1,4 trln teńgege qysqartýǵa múmkindik berdi.
«Bıýdjettiń shyǵystaryn bıýdjet tapshylyǵyn ulǵaıtý jáne Ulttyq qordan beriletin transfertter esebinen jabý úrdisi saqtalyp otyr. Kelesi jyly Ulttyq qordan 3,6 trln teńge, onyń ishinde nysanaly transfert – 1,6 trln teńge tartý josparlanýda», dedi depýtat.
Májilis spıkeri, «Amanat» partııasynyń tóraǵasy Erlan Qoshanov Ulttyq qor qarajatyn utymdy jáne tıimdi paıdalanýdyń mańyzdylyǵyna nazar aýdardy.
«Memleket basshysy Úkimetke Ulttyq qordan transfertterdi qysqartýdy jáne bıýdjet tapshylyǵy máselesin únemi onyń qarajaty esebinen sheshpeýdi birneshe ret tapsyrdy. Kiris bóligin tolyqtyrýǵa arnalǵan rezerv máselesin ekonomıkanyń barlyq sektoryndaǵy tıimsiz shyǵyndardy ońtaılandyrý arqyly sheshý kerek. Kelesi jyldan bastap «Ulttyq qor – balalarǵa» baǵdarlamasy jumys isteı bastaıdy. Endi Ulttyq qordan aqsha bólý týraly kez kelgen aqparatqa tólem alýǵa úmitker balalardyń ata-analary qatty nazar aýdarady. Bul óte sezimtal másele jáne oǵan óte muqııat qaraý kerek», dedi ol.
Májilis tóraǵasy Qaraǵandydaǵy qaıǵyly oqıǵa ónerkásip qaýipsizdigin qamtamasyz etýdegi problemalardyń taǵy da betin ashqanyn basa aıtty. Máseleni sheshý úshin partııanyń saılaýaldy baǵdarlamasynda qaýipsizdik talaptaryn buzǵany úshin jumys berýshiniń jaýapkershiligin kúsheıtý, zııandy jáne qaýipti óndiristerde jumys isteıtin barlyq qyzmetkerdiń ómiri men densaýlyǵyn mindetti saqtandyrý, sondaı-aq eńbekti qorǵaý jónindegi standarttardy joǵarylatý kózdelgen. Endi Úkimet tıisti qarjy bólýdi eskere otyryp, osy sharalardy is júzinde júzege asyrýǵa erekshe nazar aýdarýy kerek.
Sondaı-aq partııa tóraǵasy bıýdjet jobasyn qaraý kezinde azamattarǵa berilgen ýádelerdiń sapaly oryndalýyna basymdyq beriletinin atap ótti.
«Depýtattar zań jobasyna 1,7 trln teńgeni quraǵan arnaıy túzetýlerge usynystar berdi. Bıyl biz rekordty jańarttyq dep aıta alamyz. Bıýdjet qarajaty Memleket basshysynyń Joldaýynda, Prezıdenttiń saılaýaldy baǵdarlamasynda jáne partııanyń saılaýaldy baǵdarlamasynda belgilengen sharalardy ýaqtyly jáne sapaly oryndaýǵa arnalǵan. Bul bizdiń Úkimetpen birge halyq aldyndaǵy ortaq jaýapkershiligimiz», dep túıindedi Erlan Qoshanov.