Astanada «Qazaqstan: ornyqty damý jolynda» atty saraptamalyq materıaldar jınaǵy kópshilikke tanystyryldy. Oǵan elimizdiń áleýmettik-ekonomıkalyq damýynyń negizgi baǵyttary boıynsha jazylǵan eńbekter jarııalanǵan. Atalǵan jınaqty Senat janyndaǵy Jas sarapshylar klýbynyń músheleri «Taldaý mektebiniń» túlekterimen birlesip ázirledi.
Is-sharaǵa qatysqan Senat tóraǵasy Máýlen Áshimbaev byltyrǵy Prezıdent saılaýynan keıin elimizde saıası júıe keshendi túrde jańǵyrtylǵanyn atap ótti. Memlekettik qurylymnyń barynsha demokratııalyq jáne ornyqty úlgisine kóshý úderisi bastaldy. Bul rette sapaly saraptama eldiń qarqyndy damýynyń mańyzdy sharty ekeni anyq.
– Memlekettik basqarý júıesiniń tıimdiligin arttyrý úshin memlekettik organdar qyzmetinde taldaý júrgizý baǵytyn kúsheıtý qajet. Prezıdentimiz Qasym-Jomart Toqaev osy máselege árdaıym basa mán berip keledi. Memleket basshysy Ulttyq quryltaıdyń ekinshi otyrysynda memlekettik basqarýdyń tıimdiligi negizinen taldaýmen qamtamasyz etýdiń sapasyna baılanysty ekenin aıtty, – dedi M.Áshimbaev.
Sondaı-aq saıasatker búginde memleket áleýmettik máselelerdi sheshý úshin keshendi zertteýler men usynystardy qajet etetinine nazar aýdardy. Palata spıkeri atap ótkendeı, bul oraıda sapaly taldaý oryndy sheshimder qabyldaý jáne belgili bir salany damytýdyń neǵurlym tıimdi jolyn tańdaý úshin qajet.
Máýlen Áshimbaev Senat zań shyǵarý qyzmeti aıasynda sarapshylarmen tyǵyz baılanysta jumys istep otyrǵanyn da tilge tıek etti. Klýb músheleri Palata komıtetteriniń jumys toptaryna qosylyp, parlamenttik tyńdaýlarǵa, Ornyqty damý salasyndaǵy ulttyq maqsattar men mindetterdiń iske asyrylýyna monıtorıng júrgizý jónindegi Parlamenttik komıssııanyń jumysyna jáne taǵy basqa is-sharalarǵa júıeli túrde qatysyp keledi.
Aıta ketelik, Senat 2020 jyldan bastap jas sarapshylarmen júıeli baılanys ornatyp, belsendi jumys júrgizip keledi. Ár toqsan saıyn Jas sarapshylar klýby aıasynda ózekti máseleler talqylanyp otyrady. Sonyń nátıjesinde, salalyq memlekettik organdarmen jáne «Taldaý mektebi» jobasyna qatysýshylarmen birlesip, keshendi usynymdar ázirlenedi. Búginde atalǵan eki alań aıasynda 150 jas maman jumyldyrylǵan. Olar – ekonomıkada jáne eldiń qoǵamdyq-saıası ómiriniń basqa da salalarynda belsendiligimen tanylǵan bilikti mamandar.
Is-shara barysynda «Qazaqstan: ornyqty damý jolynda» saraptamalyq jınaǵyn qurastyrýǵa atsalysqan jas sarapshylar óz taqyryptary boıynsha baıandama jasady. Rýstam Bekishev «Inflıasııanyń negizgi faktorlaryn anyqtaý jáne ony tómendetý sharalary», Aınur Ámirbekova «Qazaqstannyń keń kólemdi damýyndaǵy aımaqtyq ekonomıkalyq saıasat», Telman Shýrıev «Qazaqstannyń tranzıttik-kóliktik áleýeti: jańa qaterler men múmkindikter», Aıda Ahmetjanova «Bilim berý problemalaryn sheshýdegi bıznestiń róli», Karına Kovıazına «Túbine úńilý nemese qazastandyq jastarǵa qalaısha durys kómek berýge bolady?», Dınara Esimova «Inklıýzıvti qoǵam damýy: bilim berý, densaýlyq saqtaý, múgedek adamdardy áleýmettendirý jáne jumyspen qamtý» taqyryptarynda sóz sóılep, atalǵan máselelerdiń sheshý joldaryn usyndy. Bul baıandamalar jaryq kórip otyrǵan jınaqta tolyǵyraq qamtylǵan.
Is-sharaǵa qatysqan Jaqsybek Qulekeev, Ádil Qojyqov, t.b. mamandar jas sarapshylardyń eńbekterine baǵa berip, artyqshylyqtary men kemshilikteri jaıynda pikir bildirdi.