Memleket basshysy Astana qalasynyń ákimi Jeńis Qasymbekti qabyldady. Prezıdentke elordanyń áleýmettik-ekonomıkalyq jáne ınfraqurylymdyq damýy týraly baıandaldy, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaevqa negizgi ekonomıkalyq kórsetkishter boıynsha oń dınamıka bar ekeni jóninde málimet berildi. Bıylǵy 10 aıdyń ishinde bir trıllıon teńgeden astam ınvestısııa tartylǵan. Jyl sońyna deıin jalpy somasy 87,7 mıllıard teńge bolatyn 25 ınvestısııalyq jobany, sonyń ishinde óńdeý ónerkásibi salasynda 14, bilim jáne medısınaǵa qatysty 7, logıstıka baǵytynda 4 jobany iske qosý josparlanyp otyr. Bul bastamalar 1,4 myń jumys ornyn ashýǵa múmkindik beredi.
Memleket basshysyna jylytý maýsymynyń barysy týraly da aıtyldy. Atap aıtqanda, bıyl kúzde «Ońtústik-Shyǵys» gaz jylý stansııasynyń, «Turan» gaz jylý stansııasynyń birinshi kezeńiniń jáne úshinshi JEO-nyń birinshi kezeńiniń qurylysy aıaqtaldy. Elordanyń tynys-tirshiligin qamtamasyz etetin bul nysandardyń qýaty – saǵatyna 1140 gıgakalorııa. Qala uzaq ýaqyttan beri alǵash ret bıylǵy jylytý maýsymynda jylý energııasyna degen suranysty artyǵymen qamtamasyz etetin boldy.
Kelesi jyly «Telman» gaz jylý stansııasynyń birinshi jáne «Turan» gaz jylý stansııasynyń ekinshi kezeńi paıdalanýǵa beriledi dep josparlanyp otyr. Bul nysandar qalany qosymsha 850 Gkal/saǵat jylýmen qamtýǵa septigin tıgizedi.
Sonymen qatar Jeńis Qasymbek áleýmettik nysandar (mektep, jeńildikpen beriletin qoljetimdi turǵyn úıler, medısınalyq ortalyqtar) salý, qurylysy uzaqqa sozylǵan nysandardyń jumysyn aıaqtaý, apatty jaǵdaıdaǵy eski úılerdi súrý, turǵyn úı alaptaryn damytý jáne basqa da jumystar jóninde baıandady. Atap aıtqanda, kelesi jyly elordada bes oqýshylar saraıynyń, sondaı-aq memlekettik balabaqshalardyń qurylysy bastalady.
Kezdesý sońynda Qasym-Jomart Toqaev áleýmettik jáne ınjenerlik ınfraqurylymdy odan ári damytý jóninde birqatar tapsyrma berdi.