Áıteke bı aýdany Aqkól aýylyndaǵy Abaı atyndaǵy orta mekteptiń muǵalimi Temirhan Saǵyndyqov – aǵash pen temirden túrli ulttyq buıymdar jasap júrgen naǵyz sheber. Ertedegi aýyl ustalarynyń kásibin jańǵyrtyp qana qoımaı, ony qazirgi zamanǵa beıimdep júrgen eńbekqor jan aýyldastarynyń úıinde saqtalǵan eski kebeje, sandyqtardy qaıta jóndep shyǵady. Ol Abaı mektebinde 1989 jyldan beri alǵashqy áskerı daıarlyq jáne dene shynyqtyrý pánderinen sabaq berip keledi. Áskerı sheni – zapastaǵy aǵa leıtenant. Eski dúnıeni jańartýǵa áýesqoılyqpen barǵanyn jasyrmaıdy.
Ustaz bos ýaqytyn úıiniń aýlasyndaǵy shaǵyn sheberhanada ótkizedi. Aýyldastary ákep bergen kez kelgen zatty kádege jaratyp, temirden de, aǵashtan da túrli buıymdar jasaı beredi. Onyń qolynan shyqqan tamasha músinder Aqkól mektebi men balabaqshanyń kireberisine qoıylǵan. Temirhan balabaqsha aýlasyn baldyrǵandardyń oınaýyna laıyqtap bezendirip, átkenshekterdi óz qolymen jasady. Keıingi jyldary Aqtóbedegi meıramhana, demalys oryndary Temirhanǵa sándelgen sandyqtar jasaýǵa tapsyrys berip júr.
50-jyldarǵa deıin qazirgi Áıteke bı aýdany aýyldarynda áıelderdiń áshekeı zattaryn, súıek pen aǵashtan jasaǵan turmystyq buıymdar, temirden sharýashylyqqa qajet saımandar soqqan ustalar kóp boldy. Sol zamanda ár úıde kebeje-sandyq, ydys-aıaq jınaıtyn shkaf, súıekten jasaǵan kereýet bolatyn. Aýyl ustalary soǵys jyldary, odan keıin de sharýashylyqtyń qajeti úshin soqa, tyrma, kúrekti ózderi ustahanalarda soqty.
Sheber ustaz qolóner buıymdaryn jasaýdan túrli saıystarǵa qatysyp, júldeli oryn alyp júr. 2009 jyly Aqtóbe oblysynyń eń úzdik muǵalimi atandy, «Qazaqstannyń úzdik ustazy», «Ozat pedagog» medaldarymen marapattalyp, respýblıkalyq ozattar ensıklopedııasyna endi, Bilim jáne ǵylym mınıstriniń Alǵyshatyna ıe boldy. Qolónerge beıim oqýshylaryn óz kásibine baýlyp júrgen Temirhan ustaz ertedegi sheberlerdiń ónim jasaý tehnologııasyn tereńirek úırengisi keledi. Ol úshin qolónershiler ózara tájirıbe almasatyn ortalyqtar kóbirek qajet deıdi.
Aqtóbe oblysy