Ǵylym jáne joǵary bilim mınıstrligi men «Otbasy banki» AQ birlesip ǵalymdarǵa qoljetimdi sharttarmen baspana alýdyń jańa baǵdarlamasyn iske qosty, dep habarlaıdy Egemen.kz.
2023 jyldyń 1 jeltoqsanynan bastap «Otbasy Banki» Qazaqstan ǵalymdarynyń turǵyn úı satyp alýǵa nesıelik ótinimderin qabyldaı bastady.
Joba 5 jylǵa eseptelgen. Osy kezeńde bank óz qarajatynan shamamen 16,6 mlrd teńge bólýdi josparlap otyr.
«Akademııalyq ǵylymda árqashan jas kadrlar tapshy. Sondyqtan osyny zertteı kele, baǵdarlama ázirleýdi jón kórdik. Qazir akademııalyq ǵylymda jumys isteıtin jas ǵalymdardyń ótinishterin qabyldap jatyrmyz. Bul Ǵylym jáne joǵary bilim mınıstrligine qaraıtyn 53 uıym. Bul – Memleket tarıhy ınstıtýty, Matematıka jáne matematıkalyq modeldeý ınstıtýty, Ekonomıka ınstıtýty, Ádebıet jáne óner ınstıtýty, Arheologııa ınstıtýty jáne t.b.», dedi «Otbasy banki» AQ tóraıymy Lázzat Ibragımova ortalyq kommýnıkasııalar qyzmetiniń brıfınginde.
Baǵdarlama «Otbasy Bankinde» jyldyq 5% mólsherlememen (GESV 5,2%-dan) eń tómengi 10% bastapqy jarnamen nesıe alýǵa múmkindik beredi. Baǵdarlamaǵa qatysýshy 20 mıllıon teńge shamasynda baspana ala alady. Nesıe merzimi 19 jyl.
«Mysaly, jas ǵalym 20 mıllıon teńgege páter satyp alsa, onda alǵashqy 8 jyldaǵy aldyn ala nesıe aıasynda onyń aı saıynǵy nesıe tólemi 155 myń teńgeni quraıdy. Osy kezeńnen keıin ol turǵyn úı nesıesine kóshedi jáne nesıe tólemi 11 jylǵa qazirdiń ózinde 84 myń teńgeni quraıdy», dedi Lázzat Ibragımova.
Baǵdarlamaǵa 40 jasqa deıingi jas ǵalymdar qatysa alady. Olardyń jáne olarmen birge turatyn otbasy músheleriniń sońǵy 5 jyl ishinde baspanasy bolmaýy kerek.
Turǵyn úı baǵdarlamasyna ǵylymı jáne/nemese ǵylymı-tehnıkalyq qyzmetpen aınalysatyn, magıstr dárejesinen kem emes, ǵylymı-zertteý jumysynyń keminde úsh jyl jumys ótili bar, onyń ishinde ǵylymı-tehnıkalyq jobalar men baǵdarlamalarǵa qatysatyn ǵalymdar qatysa alady.