Premer-mınıstrdiń orynbasary Tamara Dúısenova Sh.Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń jumysymen tanysty. Osy kúnge deıin 170 myńǵa jýyq qoldanýshy «Til qural» (5 deńgeıli júıe) men «Bala tili» (9 jasqa deıingi balalarǵa arnalǵan) sekildi tildik onlaın platformalar arqyly oqyǵan. 400 myńǵa jýyq termın toptastyrylǵan «Termincom.kz» platformasy da tanystyryldy. Atalǵan portal termınderdi júıeleý bazasy mindetin atqarady. Bul jumysqa tıisti salalyq mamandar tartylǵan, dep habarlaıdy Egemen.kz Úkimettiń baspasóz qyzmetine silteme jasap.
Aldaǵy ýaqytta zań salasyndaǵy termınderdi retteý jumysy kútip tur. Basty maqsat – normatıvtik-quqyqtyq aktilerdi ázirleýge, is qaǵazdaryn júrgizýge qajet termınderdi birizdendirý. Vıse-premerge platformalardyń jumysy men aralyq nátıjeleri týraly málimet berildi.
Keler jyly «Til-Qazyna» ulttyq ǵylymı-praktıkalyq ortalyǵy jasandy ıntellekt salasynda birneshe joba usynbaq. Sonyń biri – «Qazgramma» platformasy, ol jazylǵan mátinniń durystyǵyn tekserýge múmkindik beredi. Joba álemdik naryqta tanylǵan Grammarly servısiniń balamasy retinde usynylyp otyr.
«Jasandy ıntellekt ózegi – til, sondyqtan aýqymdy til modelin jasaý – memlekettiń kezek kúttirmeıtin qajettiligi. Biz osy jumysty bastadyq», dedi Ǵylym jáne joǵary bilim mınıstri Saıasat Nurbek.
Ortalyq qoljetimdi halyqaralyq aýqymdy til modelderin (LLM) qazaq tiline beıimdeý jumysyn júzege asyrýǵa daıyn ekenin bildirdi. Nátıjesin ashyq kodtar arqyly otandyq kompanııalar men memlekettik organdarǵa tegin usynyp, óz qajettilikterine saı paıdalanýyna jol ashpaq. Ortalyq dırektory Maqpal Jumabaı jasandy ıntellektini avtomatty túrde oqytý úshin memlekettik deńgeıdegi derekter qory qajettigin ortaǵa saldy.
«Qazir – sıfrlandyrý dáýiri. Aldymyzda turǵan maqsat – tilimizdi sıfrlyq keńistikte órkendetý. Jasandy ıntellektini barlyq salaǵa engizý arqyly el damýyna jol ashamyz. Bul jobalar jóninde azamattar bilýi qajet. Sondyqtan aqparattandyrý jumysyn júrgizý mańyzdy», dedi Tamara Dúısenova.
Sonymen qatar keńeste qazaq tili emtıhanyn halyqaralyq standarttaý, tildi meńgerý deńgeıin sertıfıkattaý júıesi, oqytýshylar biliktiligin arttyrý, ádistemelik quraldardy jetildirý jáne t.b. máseleler kóterildi.