Memlekettik kirister komıteti el azamattarynyń mobıldi aýdarymdarǵa qatysty kókeıtesti suraqtaryna jaýap berdi, dep habarlaıdy Egemen.kz.
Mobıldi aýdarymdar ne úshin tekseriledi?
Túsindirilgendeı, mobıldi aýdarymdardy tekserý zańsyz kásipkerlik qyzmetti kóleńkeden shyǵarý maqsatynda qoldanylady.
Keıbir kásipkerler satylǵan taýarlar nemese qyzmetter úshin tólemdi mobıldi aýdarymdar arqyly alady. Ádette, bul aýdarymdarda kassalyq apparattar, POS-termınaldar jáne QR-kodtar qoldanylmaıdy. Tıisinshe, chekter berilmeı tutynýshylardyń quqyqtary buzylady.
Buǵan deıin aıtylǵandaı, memleket barlyq mobıldi aýdarmalardy teksermeıdi. Tek ártúrli tulǵalardan úsh aı qatarynan aı saıyn 100 nemese odan da kóp mobıldi aýdarymdar alǵan tulǵalar ǵana, ıaǵnı, kásipkerlik qyzmettiń belgileri baıqalǵan jaǵdaıda ǵana tekserý júrgiziledi.
Jeke tulǵalar týystary men dostaryna aqsha aýdara ala ma?
Jeke tulǵalar burynǵydaı ózderiniń jeke maqsattary úshin týystaryna, dostaryna, ata-analaryna, balalaryna jáne basqa da ómirlik jaǵdaılarǵa baılanysty mobıldi aýdarymdar jasaı jáne qabyldaı alady. Buǵan eshqandaı shekteý qoıylmaıdy.
Kásipkerdiń tólemdi tek qolma-qol aqshamen jasaýdy talap etkeni zańdy ma? Mundaı jaǵdaıda qaıda júginýge bolady?
«Tólemder jáne tólem júıeleri týraly» Qazaqstan Respýblıkasy Zańynyń normalaryna sáıkes túrli tólem tásilderi qarastyrylǵan – bank kartasymen, QR tólemimen nemese qolma-qol aqshamen (25-bap).
Qolma-qol aqshasyz tólemderdi qabyldaýdan bas tartý zańsyz bolyp tabylady jáne tutynýshylardyń quqyqtaryn buzady.
Kásipkerlerdiń tólem kartochkalaryn paıdalana otyryp tólemderdi qabyldaýdan bas tartqany úshin birinshi ret ákimshilik jaýapkershilikke tartylyp, eskertý jasalady, al qaıtalap buzǵan jaǵdaıda – 147 680 teńge (40 AEK) kóleminde aıyppul salynady (ÁQBtK-niń 194-baby).
Qolma-qol aqshasyz tólemderdi qabyldaýdan bas tartý faktileri týraly turǵylyqty jeri boıynsha memlekettik kiris organdaryna júginý qajet.
Taksı júrgizýshileri neni elep-eskerýi tıis?
Jeke tasymaldaýshylar jeke kásipker retinde tirkelýi kerek. Muny «e-Salyq Business», «Egov Mobile» jáne keıbir ekinshi deńgeıdegi bankterdiń mobıldi qosymshalary («Halyq bank», «Kaspi bank», «BankCenterCredit») arqyly jasaýǵa bolady.
Bul rette qolma-qol aqshasyz tólemderdi qabyldaý úshin onlaın rejıminde kásipkerlik bank shotyn ashýǵa bolady, sol jerge kórsetilgen qyzmetter úshin tólemder túsedi. Ol úshin taksı júrgizýshisine tek smartfon qajet. Kassalyq apparattar men POS-termınaldardy alyp júrýdiń qajeti joq.
Bul bastama kásipkerlerdiń «kóleńkege» ketýine túrtki bolmaı ma?
Qazirgi tańda salyqtyq mindettemelerdi adal oryndaý áldeqaıda tıimdi. Sebebi qazir bıznes júrgizýge jáne ony damytýǵa qolaıly jaǵdaı jasalǵan. Salyq rejımderiniń tártibi jeńildetildi – salyq mólsherlemeleri qyzmet túrine baılanysty tek 1-4%-dy ǵana quraıdy.
Eger mundaı jaǵdaıda kásipker mobıldi aýdarymdardy qabyldasa, onda ol qazirdiń ózinde «kóleńkede» qalyp, salyq baqylaýyna túsedi.
Bul rette mobıldi aýdarymdardy tekserý adal salyq tóleýshilerge áser etpeıdi.
Osylaısha, ádildik jáne mindetti salyq salý prınsıpteri júzege asyrylady. Iаǵnı, barlyq salyq tóleýshiler teń bolýy jáne alynǵan tabystan salyq tóleýi tıis.