Qaraǵandy oblysy Buqar jyraý aýdanynda eki qabatty úıde jarylys boldy. Qutqarý jumystary tolyǵymen aıaqtaldy. Úıindi astynan 2 adamnyń máıiti men jaraqat alǵan 5 adam shyǵaryldy, dep habarlaıdy Egemen.kz.
Oqıǵa týraly Qaraǵandy oblysy TJD bastyǵy Murat Qatpanov Instagram paraqshasynda jazdy. Jarylys 30 qańtar saǵat 00:07-de Buqar jyraý aýdany, Botaqara aýylynda, Áýezov, 8a mekenjaıyndaǵy eki qabatty úıde boldy. Aldyn ala boljam boıynsha 12 páterli turǵyn úıdiń №10 páterinde turmystyq gaz ballony jarylǵan.
Jarylys saldarynan páterdiń shatyry, onyń qabyrǵalary men jabyndylary tolyq opyrylyp túsken. Birinshi qabatta ornalasqan jalpy aýdany 300 sharshy № 7 páterge de qatty zaqym tıip, onyń qabyrǵalary da qulaǵan. Sondaı-aq tótenshe jaǵdaı kezinde birinshi qabattaǵy № 5, 6, 8, ekinshi qabattaǵy № 11, 12 páterler jartylaı zaqymdanǵan. Úıde barlyǵy 46 adam turady, jarylys kezinde úıde 35 adam bolǵan.
«Saǵat 00:11-den bastap 03:37-den qutqarý jumystary kezinde úıindi astynan 1973 jylǵy er adam men 1974 jylǵy áıel adamnyń máıiti tabyldy. Túrli dene jaraqatymen Buqar jyraý aýdandyq aýrýhanasyna 3 bala jetkizildi», dedi M.Qatpanov.
Aýdandyq aýrýhana dırektorynyń mindetin atqarýshy Danııar Qojabaevtyń sózinshe, bir balanyń denesin 80 paıyz kúıik shalǵan. Bir bala Qaraǵandydaǵy aýrýhanaǵa jóneltilgen.
Oqıǵa ornynda jedel shtab quryldy. Jumysqa 139 adam men 32 tehnıka jumyldyryldy. Qutqarý jumystary tolyǵymen aıaqtaldy. Qaraǵandy oblysynyń Tótenshe jaǵdaılar departamentinde 8-7212-517223 senim telefony ashylyp, 25 azamatqa jedel psıhologııalyq kómek kórsetildi.