Otandyq ónim synaqtan sátti ótti

Bul – Memleket basshysynyń «Ádiletti Qazaqstannyń ekonomı­ka­lyq baǵyty» atty Joldaýynda aıtylǵan otandyq qorǵanys-óner­kásip keshenin damytý jónindegi mindetterdi iske asyrýǵa baǵyt­tal­ǵan jumystyń nátıjesi.

Bul qurylǵylardyń ushý-teh­nı­kalyq talaptarǵa sáıkestigin baǵalaý úshin komıssııa taǵaıyn­dal­dy. Onyń quramyna Qarýly kúsh­ter Bas shtaby men Áýe qor­ǵanysy kúshteriniń Ushqyshsyz bas­qarylatyn avıasııa júıelerin da­mytý jáne olardy qoldaný de­par­tamentiniń ofıserleri kirdi.

Barlyq ushý tehnıkasy zama­naýı beınebaqylaý quraldary­men, datchıktermen, qashyqtyq ólshe­gish­termen jáne teplovızorlarmen jab­dyqtalǵan. Sarapshylardyń nazaryna ártúrli ushý apparaty kórsetildi. Olar arnaıy rezeńke jolaqtyń kerilýimen kókke katapýlta arqyly ushyp, sonymen birge ornynan tikushaq sııaqty ti­ginen kóterilip, áýede qalyqtady. 

– Otandyq óndirýshiler ush­qysh­­syz basqarylatyn quryl­ǵy­lar­dy qysqa merzimde jasady. Olar­dyń jumysynyń nátıjesin kó­rip, baǵalaı aldyq. Árıne, áli de py­syqtaıtyn máseleler bar. De­sek te, bastamasy jaqsy, – dep atap ótti Qarýly kúshter Bas shtaby Ushqyshsyz basqarylatyn avıa­sııa­lyq júıelerdi damytý jáne olar­dy qoldaný departamentiniń ofı­seri, polkovnık Erjan Jaqa­shev.

Otandyq óndirýshi kompanııalar áskerılerdiń barlyq talaby men suranysyn eskerýge tyrysty. Elimizde óndirilgen ushqyshsyz basqarylatyn apparattardy qarý-jaraq quramyna qabyldaý bıýdjet qarajatyn edáýir únemdeýge, olardy keıinnen kútip ustaý jáne jańǵyrtý máselelerin tez arada sheshýge múmkindik beredi. 

– Apparattardyń kúndizgi jáne túngi kameralary óte tıimdi, koordınattardy anyqtaý fýnksııa­sy, lazerlik qashyqtyq ólshegish jáne oq-dárilerdi tastaý júıesi de bar. Mundaı sıpattamalar artıllerııany nysanaǵa baǵyttaýǵa múmkindik beredi. Buny Qarýly kúshterdiń mamandary jaqsy baǵalaıdy dep oılaımyn, – dedi óndirýshi kompanııa ókili Aıbek Ahysh.

Synaq aıaqtalǵannan keıin komıssııa músheleri otandyq UUA ázirleýshilerine usynylǵan qurylǵylardyń nusqalaryn pysyqtaý jáne tolyqtyrýǵa qatysty usynystar berdi.