Almatyda ıntervensııalyq hırýrgtar ınfarkt aldyndaǵy aýyr jaǵdaı - sol jaq koronarlyq arterııa dińiniń 99% stenozy bar er adamnyń ómirin saqtap qaldy. 60 jastaǵy er adam keýdesiniń aýyrsynýyna, jalpy álsizdigine, jıi sharshaý belgilerine shaǵymdanǵan. Pasıenttiń anamnezine 2017 jyly stent qoıylǵan, dep jazady Egemen.kz №7 qalalyq klınıkalyq aýrýhananyń baspasóz qyzmetine silteme jasap.
№ 7 qalalyq klınıkalyq aýrýhananyń tájirıbeli, joǵary bilikti ıntervensııalyq hırýrgteri jedel tekserý barysynda naýqastyń jaǵdaıynyń aýyrlyǵyn baıqady.
Júrek tamyrlaryn dıagnostıkalaý maqsatynda qan tamyrlarynyń jaǵdaıy boıynsha ota jasaý týraly sheshim qabyldaý úshin aldymen koronarografııa júrgizildi.
Naýqastyń jaǵdaıy óte aýyr edi, ólim qaýpi joǵary boldy, óıtkeni koronarografııa sol jaq koronarlyq arterııanyń baǵanaly zaqymdanýyn anyqtady (90%).
«Naýqastyń dińdik arterııasy zaqymdanǵan. Eger arterııa 99,9% jabylyp qalsa, bul aýyr zaqymdaný - ólimge ákeledi. Asqyný qaýpi de óte joǵary. Mundaı jaǵdaıda ádette ashyq ota jasaý kerek. Zertteý nátıjesi boıynsha da stent qoıýǵa bolady, eki jaǵdaıda da asqyný qaýpi birdeı», dedi ıntervensııalyq hırýrgııa bólimshesiniń meńgerýshisi, ota jasaǵan hırýrg Sáken Anartaev.
Dárigerler naýqasqa otanyń óte kúrdeli bolatynyn, qaýpi tym joǵary ekenin aldyn ala eskertken.
«Qan tamyrlarynyń jaǵdaıy turaqty emes edi. Sol jaq koronarlyq arterııanyń bıfýrkasııa (tarmaqtalýy, bólinýi) aımaǵynda kúrdeli stenoz boldy, bul qan tamyrlarynyń qabyrǵasyndaǵy túıinshekterbar degen sóz. Sonymen qatar naýqasta túıinshikterdiń jarylýy baıqalǵan, sonyń saldarynan júrektiń ıshemııalyq aýrýynyń klınıkasy ulǵaıdy.
Sonymen birge ınfarkt pen júrek qyzmetiniń toqtap qalý qaýpi boldy. Naýqas shuǵyl otaǵa daıyn bolǵandyqtan, az ınvazıvti ádispen operasııa jasaý týraly sheshim qabyldandy.
«Dárigerlerdiń aldynda kúrdeli mindet turdy, al dárigerlerge uqypty bolý kerek edi. О́ıtkeni, sol jaq koronarlyq arterııa dińiniń dısseksııasy jáne turaqsyz túıinshikter boldy. Ota kezinde tarylǵan aımaq arqyly mıkrokateter men koronarlyq ótkizgish qoldanyldy. Bul ádis qan aǵymyn toqtatpaý úshin júzege asyrylady. Bir ótkizgish aldyńǵy qarynshaaralyq arterııaǵa, ekinshi ótkizgish aınalmaly arterııaǵa ótkizildi jáne baıaý ballondaý-keńeıtý júrgizildi», delingen aqparatta.
Dárigerler azamattarǵa jylyna bir márte kardıologtyń keńesin tyńdap, júrekti tekseristen ótkizip turýǵa keńes beredi.