Senat otyrysynda depýtat Álisher Satybaldıev Tik-Tok jelisi alańynda jaǵymsyz kórinisterdiń taralyp jatqany týraly másele kóterdi, dep jazady Egemen.kz joǵarǵy Palatanyń baspasóz qyzmetine silteme jasap.
Depýtat 13-ten bastap 24 jasqa deıingi jastardyń 75%-y osy platformany paıdalanatynyn aıtty. Tipti 4-5 jastaǵy balalar Tik-Tok-ta kúnine orta eseppen 75 mınýtyn ótkizetin bolyp shyqty. Ondaǵy mazmun da ártúrli, onyń ishinde tolyq qalyptasyp úlgermegen balalar men jasóspirimderdiń sana-sezimine zııan tıgizýi múmkin.
Senator ár el bul qubylyspen árqıly kúresip jatqanyn atap ótti. Keıbir memleketterdiń talaby boıynsha 18 jasqa deıingi jasóspirimderge kúnine 1 saǵat lımıt qoıatyn jańa fýnksııa engizilýde, Tik-Tok-ta kámeletke tolmaǵandardyń derekteri saqtalǵany úshin aıyppul salynady. 13 jasqa deıingi balalarǵa kúnine 30 mınýtqa deıin meje qoıylǵan, ony ata-anasynyń ruqsatymen 1 saǵatqa deıin arttyrýǵa bolady. Keıbir elder bul platformany óz aýmaǵynda tolyǵymen jaýyp tastady.
«Kóterilip otyrǵan másele óskeleń urpaqtyń taǵdyryna teris áser eteninin eskere otyryp, shuǵyl sharalar qabyldaý kerek dep esepteımiz. Osy oraıda TikTok jáne ózge de áleýmettik jeli ákimshiligi tarapynan ulttyq zańnamamyzdyń talaptaryn oryndaýy jáne kámeletke tolmaǵandardyń qaýipsizdigin qamtamasyz etý barysyna monıtorıng júrgizý kerek. Anyqtalǵan kemshilikter boıynsha halyqaralyq tájirıbege súıenip, tıisti sharalar qabyldanýy tıis», dedi senator.