Kartına qupııasy

Rafael Santı – renessans sýretshileriniń biri. Halyq ony Mıkelandjelo, Leonardo da Vınchılermen qatar qoıady. Nebári 37 jyl ómir súrip, sýret álemine 184 kartına syılap ketken. Búgingi áńgimemiz onyń ta­nymal eńbeginiń biri  – «Ma­donna jáne raýshan» kartınasy týraly bolmaq.

Bredford ýnıversıtetiniń ǵalymdary bastaǵan sarapshylar toby osy kartınadaǵy Áýlıe Djozeftiń betin bas­qa sýretshi salǵanyn anyq­tady. Zertteý jasandy sana kó­megimen júrgizilgen. Al sý­­rettiń qalǵan bóligin Ra­fael­diń ózi salǵanyna jasandy ıntellekt esh kú­mán kel­tir­meıdi. Jumys ná­tıjeleri «Heritage Science» jýrnalynda jarııalandy.

Ǵalymdar ázirlegen algorıtm Rafael Santıdiń ózi salǵan týyndylaryn 98 pa­ıyz dáldikpen tanı alady. Bul algorıtm sýretshiniń qylqalamynyń negizinde ja­salǵan. Degenmen óner qu­pııasyn ashatyn zertteý óner­­tanýshylar tarapynan synǵa ushyrady. Al ǵa­lymdar teris pikir esti­gen saıyn «kom­pıý­terlik ádis­terdi odan ári jetil­diri­p, óner syrlaryn asha túsemiz» deıdi.

– Taldaý mashınalyq oqytý men obektıvti jáne sandyq tásil negizinde jasalǵan. Ra­faeldiń sýretterin qoldana otyryp, onyń stılin, túster palıtrasynan, kóleńkelerdi jáne jumystyń barlyq as­pektilerin zerttedik. Kom­pıý­ter adamnyń kózi­men salys­tyr­ǵanda mıkroskopııalyq deńgeıde kóredi. Osy al­gorıtm bolashaq zertteýlerde de paıdasyn beredi dep se­nemiz. Ja­­sandy ıntellekt ómir men ónerdiń qupııasyn áli de asha túsedi, – deıdi zertteý ju­my­synyń birlesken tel­avtory Hasan Ýgaıl.

Bul zertteýdiń nátıjeleri avtorlyq quqy týraly sheshim qabyl­daýǵa jetkiliksiz. Sebebi ja­san­dy zııat eskermegen ózge de kóp­tegen faktor bolýy múmkin.