Syrdarııa aýdanynda bıylǵy egiler kúrishtiń alǵashqy dáni sebildi. Osyǵan baılanysty aýdandaǵy «Maǵjan jáne K» JShS-nyń N.Ilııasov aýlyndaǵy egis alqabynda «Dala kúni» semınar-keńesi uıymdastyrylyp, oǵan oblys ákimi Nurlybek Nálibaev, Parlament Májilisiniń depýtattary Murat Ábenov, Marhabat Jaıymbetov, Murat Ergeshbaev, Qazaqstannyń Eńbek erleri Abzal Erálıev, Imamzada Shaǵyrtaev, sharýa qojalyqtary ókilderi men sala ardagerleri qatysty.
О́ńir basshysy ardagerlermen egis alqabyna dán seýip, el baılyǵyn eselegen dıqan eńbegine tabys tiledi. Bıyl óńirde 187,5 myń gektarǵa egin, onyń ishinde 78,3 myń gektarǵa kúrish sebý josparlanǵan. Jyldan-jylǵa jalǵasyp kele jatqan sý tapshylyǵy «Úıdegi kóńildi bazardaǵy naryq buzadynyń» kerin keltirip, sharýalardyń qolyn baılap otyr. Osydan da keıingi jyldary óńirde sýdy az qajet etetin malazyqtyq, maıly daqyldar men kartop, kókónis kólemin arttyrý qolǵa alyndy.
Kún jylyp, jerdiń tońy jibı sala, kóktemgi dala jumystaryna kirisken sharýashylyqtar 32,2 myń gektar jerge erte egiletin daqyl septi. Osy kúnnen bastalatyn kúrish egisine qajetti tuqym qory tolyq, tyńaıtqysh ta josparǵa saı jetip tur. Kóktemgi dala jumystary úshin oblysqa Úkimet tarapynan arzandatylǵan baǵamen 12,9 myń tonna dızel otyny bólindi.
Aýyl sharýashylyǵyndaǵy máseleler aıtylyp, sharýa qojalyǵy ıeleriniń usynys-pikirleri talqylanǵan semınar-keńeste oblys ákimi agrarlyq saladaǵy keıbir túıindi tustardyń tarqatylyp jatqanyn da aıtyp ótti.
«Memleket basshysy Qasym-Jomart Kemeluly Toqaevtyń aýyl sharýashylyǵynyń jalpy ónim kólemin aldaǵy 5 jylda eki ese arttyrý jóninde tapsyrma bergenin bilesizder. Bıyl Úkimet maquldaǵan egiletin egis kólemi 187 myń gektar bolyp belgilendi. Sý tapshylyǵyna baılanysty jyl basynda Sý resýrstary jáne ırrıgasııa mınıstrligi kúrish kólemin edáýir azaıtý jóninde usynys bergen. Eki jyl buryn negizgi daqyldy 64 myń gektarǵa deıin qysqartý jóninde sheshim qabyldanǵan edi. Dıqandardyń jaǵdaıyn eskerip, Memleket basshysyna usynystar daıyndadyq. Prezıdent pen Úkimettiń qoldaýynyń arqasynda aımaqta sý tapshylyǵynyń aldyn alý sharalary qabyldanyp, kúrish alqabyn 78 myń 600 gektarǵa jetkizýge múmkindik jasaldy», dedi aımaq basshysy.
Bıyl da egiske sý jetkizý ońaı bolmaıdy. Osydan da kúrishti belgilengen kólemnen asyrmaı egý qajet. Jalpy, sý tapshylyǵynyń jyldan-jylǵa jalǵasa beretini anyq. Sondyqtan da sý únemdeý tehnologııalaryn óndiriske engizip, egisti ártaraptandyrýǵa kóshken jón. Lazermen tegistelgen atyz sýdy 20 paıyzǵa deıin únemdep, ónimdilikti 30 paıyzǵa deıin arttyrýǵa múmkindik beredi. О́ndiriske jańalyq engizgender utylmaıdy. Mysaly, egistikke tyńaıtqyshtar men pestısıdter berýde dron paıdalaný ekonomıkalyq turǵyda tıimdi. Oblys ákimi bizdiń aımaqta da osy tájirıbeni engizýdi qolǵa alý qajettigin aıtyp ótti. «Dala kúni» semınar-keńesinde Syr óńiriniń aýyl sharýashylyǵyn sıfrlandyrýdaǵy alǵashqy qadam jasaldy. Qytaı ınvestorlary ókilderiniń qatysýymen «Baıqońyr» áleýmettik-kásipkerlik korporasııasy» aksıonerlik qoǵamynyń basqarma tóraǵasy Ǵızat Ábiltaı jáne «Suńqar Evıjen Interneıshnl LTD» jaýapkershiligi shekteýli seriktestiginiń dırektory Azat Betekbaev ózara áriptestik ornatýdy kózdeıtin qujatqa qol qoıdy.
Keıingi jyldary aımaqta jergilikti turǵyndar kartop, kókónis, baqsha ónimderimen óz-ózin qamtamasyz etýi úshin egistik jer daıyndap berý tájirıbesi paıda bolǵan. Jergilikti jurt úshin tıimdi joba bıyl da jalǵasyn tabady. Eki jyl buryn osy maqsatta 1,8 myń gektar jer berilse, byltyr 5 500 otbasyǵa aýyldardan 3 300 gektar jer daıyndaldy.
«Bul ár úıdiń óz-ózin azyq-túlikpen qamtamasyz etý, otbasy bıýdjetin eseleý múmkindigin arttyrǵanyn baıqadyq. Qajet bolsa, turǵyndarǵa arnaıy tehnıkalarmen atyzdardy tazalap, jeke kókónis saqtaý qoımasyn qazýǵa qoldan kelgenshe kómektesý qajet. Úleskerlerdiń jerin paıdalanatyn sharýashylyqtar bul jumystardy qaperde ustaýy kerek», dedi Nurlybek Mashbekuly.
Oblys basshysy qala, aýdan ákimderine jer daıyndaýǵa basa mán berip, jumysty utymdy uıymdastyrýdy tapsyrdy.
Qyzylorda