Ǵylym men joǵary bilim – bolashaqta bıik asýlardy baǵyndyra alatyn qoǵamnyń negizgi tiregi. Bul rette elimiz de óziniń bolashaǵyn ǵylym-bilimmen tikeleı baılanystyryp, bilim salasyn ár deńgeıde damytyp, joǵary nátıjeler kórsetip jatyr. О́z kezeginde Nazarbayev University qazirgi kezde elimizdegi ǵylymı úderistiń kóshbasshysy atanyp otyr.
2023 jylǵy qyrkúıekte álemdegi eń bedeldi «Times Higher Education» reıtıngi boıynsha atalǵan ýnıversıtet úzdik oqý oryndarynyń qatarynan kórindi. Al bıyl mamyr aıynda Azııa elderiniń úzdik oqý oryndary reıtınginde 129-orynnan kórinip, Ortalyq Azııa elderi arasynda kósh bastady. Bul – ǵylym men bilimge adal oqytýshylardyń, ǵalymdar men stýdentterdiń ortaq jemisi. Bar bolǵany 14 jyldyń ishinde Nazarbayev University birneshe ǵasyrlyq tarıhy bar Azııanyń eń kóne joǵary oqý oryndaryn basyp ozdy. Osy ýaqyt ishinde ýnıversıtet qazirgi kezde Qazaqstan ekonomıkasynyń túrli salalarynda aıanbaı eńbek etip júrgen kóptegen jas mamandy oqytty. Olar elimizdegi progrestiń qozǵaýshy kúshi ekeni sózsiz. Keıbir túlekter «Dıplommen – aýylǵa!» baǵdarlamasy aıasynda shalǵaıdaǵy eldi mekenderge turaqtap jatyr. Bul ýnıversıtettiń óz stýdentterine bilim men qatar boılaryna patrıottyq sezimdi daryta alǵanynyń birden-bir dáleli. Sonymen qatar ýnıversıtet jahandyq maqsattarǵa jetý jolynda sheteldik áriptestermen belsendi túrde jumys istep keledi. 2017 jyly Beıjiń ýnıversıteti, Tokıo ýnıversıteti jáne Seýl ulttyq ýnıversıteti sııaqty bedeldi joǵary oqý oryndarymen birge NU Azııa elderi ýnıversıtetteri alıansynyń negizin qalady. Sońǵy ýaqyttaǵy dúnıejúzilik qaýymdastyqtyń azııalyq bilimge degen qyzyǵýshylyǵyn eskerer bolsaq, atalǵan joǵary oqý ornynyń bolashaqta kóptegen reıtıngte kósh bastaıtyn qaýqary bar.
Kez kelgen joǵary oqý orny jumysynyń negizgi kórsetkishi ǵylym ekeni anyq. Bul rette atalǵan bilim ordasynyń ǵylymı jetistikteri de barshylyq. Sońǵy derekterge sáıkes, ýnıversıtette 9 myńǵa jýyq ǵylymı maqalalar jarııalanǵan. Olardyń jartysy Q1 deńgeıindegi «Scopus» jýrnaldarynda jarııalanǵan. Jalpy, NU jarııalanymdaryna ǵalymdar álem boıynsha ortaq kórsetkishten 49%-ǵa jıi júginedi. Ýnıversıtettiń ǵalymdary men stýdentteri aýrýhanalarda ońaltý maqsatynda qoldanylatyn robottar qurastyryp, Alsgeımer jáne Parkınson sııaqty kúrdeli aýrýlardy zertteıdi, jasandy ıntellektige qazaq tilin úıretip, ekologııalyq máseleler men kún tártibindegi taǵy da basqa problemalardy sheshýge atsalysyp jatyr. Nazarbayev University otandyq mektepterdiń túlekterine álemdegi eń myqty oqý oryndarynan kem emes joǵary bilim bere alatynyn senimmen aıtýǵa bolady. Sondaı-aq NU-dyń Ortalyq Azııadaǵy ǵylymı úderis pen sapaly bilimniń kóshbasshysyna aınalǵanyn moıyndaý kerek. Onyń túrli reıtıngterdegi orny men ǵylymı jetistikteri – buǵan tikeleı dálel. Alaıda eń mańyzdysy – sandar men reıtıngter emes, ýnıversıtettiń stýdentter ómirine jáne jalpy qoǵamǵa qalaı áser etetini odan da mańyzdyraq. Nazarbayev University qashanda óńirdiń zııatkerlik resýrstary men mádenı murasyn damytýǵa yntalandyrady. Onyń bilim men ǵylym salasyndaǵy orny jyl saıyn nyǵaıyp keledi. Sol sebepti joǵary oqý orny álemdik standarttarǵa saı bolyp qana qoımaı, Ortalyq Azııa men odan da alys jerlerde bilim salasyndaǵy standarttardy ornatýshy dep senimmen aıta alamyz.