Búgin Premer-mınıstr Oljas Bektenovtiń tóraǵalyǵymen ótken Úkimet otyrysynda elimizdegi sý tasqyny jaǵdaıy kún tártibinen tys qaraldy, dep habarlaıdy Egemen.kz.
Úkimet otyrysynda vıse-premer Qanat Bozymbaev elimizdegi sý tasqyny jaǵdaıy turaqtalyp kele jatqanyn aıtty. Osy aptada Atyraý oblysynda sý tasqynynyń sharyqtaý shegi bolady dep boljanyp otyr. Búginde Jaıyq ózenindegi sý deńgeıi Inderbor jáne Mahambet kentterindegi sý beketterindegi qaýipti belgilerden asyp tústi. Qazirgi ýaqytta óńirde aýmaqqa topyraq úıý, qum toltyrylǵan qapshyqtardy tóseý, topyraqtan bilikter salý jáne sý aıdaý jumystary júrgizilip jatyr. Elimizdiń segiz óńirinde jergilikti aýqymdaǵy tótenshe jaǵdaı rejımi saqtalyp otyr. Aqtóbe oblysyndaǵy eki eldi mekende áli de kólik qatynasy joq. Turǵyndar azyq-túlikpen jáne dári-dármektermen qamtamasyz etilgen. Sý basqan aımaqtardan 119 myńnan astam adam, onyń ishinde 44 myń bala evakýasııalandy. Búgingi tańda 55,6 myń adam óz úılerine oraldy. Ázirge evakýasııalaý beketterinde 5 myńǵa jýyq azamat qaldy. Sý tasqyny saldarynan elimizde 12 908 turǵyn úıdi sý basty, onyń ishinde úsh óńirde áli 264 úı sý astynda qalyp otyr. Sondaı-aq 18 025 saıajaı úıi bar 25 921 saıajaı ýchaskeleri sý astynda qaldy.
Búgingi tańda 20 600 otbasy 100 AEK mólsherinde bir rettik tólem aldy. Tólengen qarajattyń jalpy somasy 7,5 mlrd teńgeni qurady. 680 otbasyna 362 mln teńge kóleminde keltirilgen materıaldyq shyǵyn óteldi. 568 otbasy 710 mln teńgege turǵyn úıdi jóndeýge jáne qalpyna keltirýge ótemaqy aldy. О́ńirlerde keltirilgen zalaldy baǵalaý jáne óteý jumystary jalǵasyp jatyr. Jaǵdaı turaqty baqylaýǵa alynǵan. Oljas Bektenov tıisti qurylymdarǵa tasqynǵa qarsy jumystardy jalǵastyrýdy tapsyrdy. Ásirese, Jaıyq ózenindegi qaýipti deńgeıden asyp ketken Inderbor jáne Mahambet eldimekenderindegi jaǵdaıdy baqylaýǵa alý kerek.
«Evakýasııalyq beketter kez kelgen ýaqytta adamdardy qabyldaýǵa daıyn bolýy tıis. Kúshter men quraldar da saqadaı saı turýy kerek. Sý resýrstary mınıstrligi men Atyraý oblysynyń ákimdigi Jaıyq ózenindegi sý deńgeıine turaqty monıtorıng júrgizýdi qamtamasyz etsin», dep tapsyrdy Úkimet basshysy.Sonymen qatar Aqtóbe oblysynda 2 eldimekende áli kúnge deıin kólik qatynasy joq. Onda azyq-túlik pen dári-dármekterdiń bolýyn muqııat baqylaýǵa alý kerek. Elektr jaryǵynsyz otyrǵan aýyldarda jóndeý jumystaryn tezdetý kerek.
«Sondaı-aq sý tasqyny jaǵdaıy turaqtalǵan óńirlerde ákimdikter baǵalaý jáne jobalaý jumystaryn kúsheıtýge tıis. Keltirilgen zalaldy óteý, onyń ishinde úıler men ınfraqurylymdy qalpyna keltirý jónindegi barlyq sharalar belgilengen merzimde iske asyrylýy qajet. Biz zardap shekken turǵyndardyń múmkindiginshe tezirek qalypty ómirge qaıta oralýyn qamtamasyz etýimiz kerek», dep túıindedi sózin Premer-mınıstr.