Búginde elimizde 11 346 mektepke deıingi tárbıe men oqytý uıymy jumys isteıdi. Bıyl 229 memlekettik balabaqshany jóndeýden ótkizý josparlandy, dep habarlaıdy Egemen.kz Oqý-aǵartý mınıstrliginiń baspasóz qyzmetine silteme jasap.
Mektepke deıingi bilim berý mekemeleriniń jóndeý jumystary balalardyń bilim alýy men tárbıesi úshin jaǵdaıdy jaqsartýǵa baǵyttalady. Osylaısha, ótken jyldyń sońynda 198 nysandy jańǵyrtý jumystary aıaqtaldy. Olar kúrdeli jáne aǵymdaǵy jóndeýden ótip, kompıýterlik tehnıka jańartyldy.
«Biz balalarymyzdyń oqýy men damýy úshin barynsha jaǵdaı jasaýǵa tyrysamyz. Mektepke deıingi uıymdardy jóndeý – bolashaqqa salynǵan ınvestısııa, biz ony ár bala úshin jarqyn ári tabysty etýge umtylamyz», dep atap ótti mektepke deıingi tárbıe departamentiniń dırektory Manar Adamova.
Sonymen qatar respýblıkada balabaqshalardyń jańa jelileri ashylyp, keńeıip jatyr. Sońǵy 3 jylda mektepke deıingi uıymdar jelisi 801 nysanǵa ulǵaıdy. Sońǵy 5 jylda balabaqsha kezegindegiler eki esege qysqaryp, 2 men 6 jas aralyǵyndaǵy balalar 91 paıyzǵa jetken. Bıyl bul kórsetkishti 92,5 paıyzǵa jetkizý josparlanyp otyr.
Qyrmyzy JUMAǴALIQYZY,
EUÝ stýdenti