Búgin Senattyń jalpy otyrysynda depýtat Altynbek Nýhuly Qazaqstanda oqý pánderi damyǵan eldermen salystyrǵanda 2,5 ese kóp ekenin aıtyp, olardyń sanyn azaıtýdy usyndy, dep jazady Egemen.kz.
Depýtat keltirgen dáıekke súıensek, Japonııa, Ońtústik Koreıa, Fınlıandııa men Kanadada mektep oqýshylary 7-8 synypta naqty ǵylym salalaryna qatysty 4-6 pán oqıdy. Al bizdiń elde osy synyptarda 15 pán oqytylsa, 9 synypta kórsetkish 16-ǵa jetedi.
«Qazaqstanda mindetti oqý pánderdiń sany 2,5 ese kóp, mundaı shamadan tys pánderdiń jalpy sany álemde birde-bir damyǵan elde joq. Bizde hımııa, bıologııa men geografııa jeke-jeke pán retinde 578 saǵat kóleminde oqytylsa, Japonııa, Ońtústik Koreıa, Fınlıandııa men Kanada sııaqty memleketterde osy pánder toptastyrylyp, bir ǵana, ǵylym páni dep, 324 saǵat beriledi, ıaǵnı, kólemi de eki esege jýyq az oqytylady», dedi Altynbek Nýhuly Joǵary palata jıynynda.
Qazaqstanmen salystyrǵanda oqý saǵaty az bolǵanmen atalǵan elderde nátıje joǵary. Máselen, PISA qorytyndysynda olardyń jaratylystaný baǵytyndaǵy bilimi joǵary bolǵan. Depýtat dereginshe, bul Japonııa, Ońtústik Koreıa, Fınlıandııa elderinde oqytýdyń ýaqytyna emes, onyń sapasyna basa kóńil bóletinin ańǵartady.
«Budan bólek, Qazaqstanda mektep oqýshylaryna taqyryp boıynsha shamadan tys kólemdi aqparat beriledi jáne oqýlyqtardyń tili aýyr ári ǵylymı sıpatta beriledi. Al ozyq elderdiń taǵy bireýi – Ulybrıtanııada, kerisinshe, aqparat kólemdi emes, taqyryptar tájirıbege baǵyttalyp, kúndelikti ómirdiń jaǵdaıattarymen baılanystyrylyp oqytylady. Basqasha aıtqanda, oqýshynyń aldaǵy ómirinde pragmatıkalyq turǵydan qanshalyqty mańyzdy ekenine kóp kóńil bólinedi, ıaǵnı oqýshylardyń quzirettiligin qalyptastyratyn nátıjege baǵdarlanǵan bilim beriledi», dedi senator.
Senator saýalyn Úkimet basshysynyń orynbasary Tamara Dúısenovaǵa joldap, Qazaqstanda bilim mazmunyn zamanaýı deńgeıde jańartýdy usyndy.