Is-sharaǵa Ázerbaıjan, Belarýs, Qazaqstan, Qyrǵyzstan, Reseı, О́zbekstan elderinen jas patrıottar komandalary qatysýǵa nıet bildirdi. Saıysta 14 pen 17 jas aralyǵyndaǵy barlyǵy 750 ul-qyz baǵyn synap jatyr, dep habarlaıdy Egemen.kz Qorǵanys mınıstrliginiń baspasóz qyzmetine silteme jasap.
Áskerı-patrıottyq jıyn Keńes Odaǵynyń Batyry, № 1 Halyq qaharmany, Táýelsiz Qazaqstannyń tuńǵysh qorǵanys mınıstri armııa generaly Saǵadat Nurmaǵambetovtyń týǵanyna 100 jyl tolýyna oraılastyryldy. Jıynnyń saltanatty ashylýy kórnekti áskerı qolbasshynyń esimimen atalatyn Qurlyq áskerleriniń áskerı ınstıtýtynda ótti.
Is-shara Saǵadat Nurmaǵambetov eskertkishine gúl shoqtaryn qoıýdan bastaldy. Qaýipsizdik Keńesiniń hatshysy Ǵızat Nurdáýletov, Qorǵanys mınıstri general-polkovnık Rýslan Jaqsylyqov, halyq batyrynyń qyzy Aısulý Nurmaǵambetova jáne sheteldik delegasııalardyń ókilderi Qurmet qaraýyl rotasynyń súıemeldeýimen Qazaqstan Qarýly kúshteri Ulttyq áskerı-patrıottyq ortalyǵy Ortalyq áskerı orkestriniń saltanatty áýenimen dańqty maıdangerdi eske aldy.
Prezıdent Qasym-Jomart Toqaevtyń Qazaqstannyń jas patrıottaryna joldaýyn Qaýipsizdik Keńesiniń hatshysy Ǵızat Nurdáýletov oqyp berdi. Onda: «Kez kelgen eldiń bolashaǵy jastardyń qolynda. Sondyqtan senderge úlken jaýapkershilik júktelip otyr. Sender adal jáne eńbekqor, aqyldy ári batyl, Otanymyzdyń laıyqty azamattary jáne naǵyz patrıottary bolýlaryń kerek. Barlyǵyń jıynǵa muqııat daıyndalyp, jeńiske jetem degen nıetpen keldińder. Mundaı jarysqa qatysýdyń ózi árqaısyń úshin mańyzdy jetistik jáne este qalarlyq oqıǵa», delingen.
Qorǵanys mınıstri general-polkovnık Rýslan Jaqsylyqov óz sózinde halyqtar arasyndaǵy burynnan kele jatqan berik baılanys qashanda ózara senim men qoldaýǵa negizdelgen dostyq qarym-qatynasta bolǵanyn atap ótti.
«Qanshama synnan ótsek biz ata-babalarymyzdyń dástúrlerin, qundylyqtary men mádenı-rýhanı muralaryn saqtaı aldyq. Búgingi halyqaralyq áskerı-patrıottyq jıyn – halyqtar arasyndaǵy dostyq pen kórshi eldermen tatýlyqqa degen umtylystyń jarqyn dáleli», dep atap ótti ol.
General-polkovnık Rýslan Jaqsylyqov jıynǵa qatysýshylarǵa óz kúshterine senip, maqsatqa jetýde tabandylyq tiledi.
Olar úshin kaskaderler shoýy, batyrlar bıi, «Jasa, Saǵadat» mýzykalyq nómiri, Ortalyq áskerı orkestr men Qurmet qaraýyl rotasynyń defılesi bar merekelik baǵdarlama daıyndaldy.
Armııa generaly Saǵadat Nurmaǵambetovke arnalǵan «Halyq júregindegi qaharman» ekspozısııasy týraly Qarýly kúshter Memlekettik áskerı-tarıhı mýzeıi Almaty fılıalynyń bastyǵy Alýa Baıqadamova aıtyp berdi.
Is-sharada Qorǵanys mınıstri general-polkovnık Rýslan Jaqsylyqov «General S.Q. Nurmaǵambetovtyń áskerı murasy jáne onyń qazirgi zamanǵy mańyzy» atty jańa kitapty tanystyryp, 1-shi Túrkistan pýlemetshiler áskerı ýchılıshesiniń kýrsantynan armııa generalyna deıingi jaýyngerlik joldan júrip ótken soǵys batyrynyń Táýelsiz Qazaqstan armııasynyń qalyptasýy men damýyna qosqan zor úlesin atap ótti.
«Sol bir qıyn ýaqyttardaǵy onyń jaýyngerlik tájirıbesi, áskerıler arasyndaǵy joǵary bedeli men Otanǵa minsiz qyzmet etýdegi ónegesi Qarýly kúshterdi qurý men derbes damytýdyń kepili boldy», dedi ol.
Armııa generaly Saǵadat Nurmaǵambetovtiń esimi elimizdiń tarıhyna altyn áriptermen jazylǵan.
Is-shara barysynda «Birlik ordasy» mobıldi-ınteraktıvti ekspozısııasy kórsetildi. Onda jıynǵa qatysýshy elder mádenıetiniń, dástúrleri men ádet-ǵuryptarynyń erekshelikterimen tanysýǵa bolady. Sonymen qatar «Jas sarbaz» respýblıkalyq áskerı-patrıottyq qozǵalysynyń tóraǵasy maıor Meıirbek Meńdiǵalıev «Saǵadat» kovorkıng-aımaǵyn tanystyrdy.
Jıynnyń burnaǵy jyldardaǵy jeńimpazdarymen jáne júldegerlerimen bolǵan kezdesýde «Jas sarbaz» qozǵalysynyń qazirgi tárbıelenýshileri olardyń ómir joly qalaı órilgenin estip bildi. Búginde olardyń kóbi elimizdiń áskerı oqý oryndaryn bitirip úlgerse, keıbiri kýrsant.
Jıynnyń saltanatty ashylýyna deıin «Álı» oqý-jattyǵý ortalyǵynda ulttyq sport túrlerinen, AK-74-ti tolyq bólshekteý men qurastyrýdan birqatar jarystar uıymdastyryldy. Oǵan qosa jas ónertapqyshtar arasynda Smart Sarbaz baıqaýy men «Aıbyn daryny» zııatkerlik oıyny ótti.
Jarystar jalǵastyrylyp jatyr. Apta qarqyndy bolmaq. Áskerı tehnıkanyń, jabdyqtardyń, sporttyq jabdyqtardyń kórmesi, klýbtardyń qyzmeti týraly stendterdiń bárin 18–22 maýsym aralyǵynda Qurlyq áskerleri áskerı ınstıtýtynyń «Álı» oqý-jattyǵý ortalyǵynan kórýge bolady. Sondaı-aq konsertter, dárister, sporttyq oıyndar, ot jaǵý keshteri jáne Halyq qaharmany týraly fılmder kórsetý josparlanǵan.