Premer-mınıstr Oljas Bektenov Qytaı Halyq Respýblıkasy Tóraǵasynyń memlekettik sapary aıasynda Qazaqstanǵa kelgen China National Petroleum Corporation (CNPC) Dırektorlar keńesiniń tóraǵasy Daı Hoýlıanmen kezdesý ótkizdi, dep habarlaıdy Egemen.kz Úkimettiń baspasóz qyzmetine silteme jasap.
Energetıka salasyndaǵy ınvestısııalyq yntymaqtastyqty tereńdetý máseleleri qaraldy. Shymkent munaı óńdeý zaýytynyń óndiristik qýatyn arttyrý jónindegi birlesken jobaǵa erekshe nazar aýdaryldy. Kezdesýge qatysýshylar jobanyń aǵymdaǵy kezeńin talqylap, nysandy ýaqytyly paıdalanýǵa berý úshin jańǵyrtý qarqynyn jedeldetý nıetin rastady. Shymkent MО́Z-in keńeıtýdi eskere otyryp, zaýytty shıkizattyń jetkilikti kólemimen qamtamasyz etý jáne Keńqııaq – Atyraý, Keńqııaq – Qumkól munaı qubyrlaryn keńeıtý sharalary qaraldy. Qazirgi ýaqytta Qazaqstan jáne Qytaı sarapshylary qajetti esepter júrgizip jatyr. Kezdesý barysynda Oljas Bektenov pen Daı Hoýlıan «Beıneý – Bozoı – Shymkent» gaz qubyrynyń birinshi jelisin salý jáne iske qosý boıynsha tabysty júzege asyrylǵan birlesken jobany mysalǵa ala otyryp, gaz salasyndaǵy yntymaqtastyqty odan ári arttyrý perspektıvalaryna toqtaldy. Úkimet basshysy birlesken kásiporyndar tabysty ári ekonomıkalyq jaǵynan tıimdi ekenin aıtty. Sonymen qatar Premer-mınıstr jergilikti taýar óndirýshilermen jáne qyzmet kórsetýshilermen tyǵyz ózara is-qımyl jasaý arqyly jergilikti qamtý úlesin kezeń-kezeńimen ulǵaıtýdyń mańyzdylyǵyn atap ótti.
«Qazaqstan da kóptegen elder sekildi, eldiń energetıkalyq qaýipsizdigin qamtamasyz etý boıynsha strategııalyq mindet qoıyp otyr. Eń aldymen, bul – munaı óńdeý qýattaryn qurý jáne jańǵyrtý. Biz Shymkent munaı óńdeý zaýytynyń óndiristik qýatyn arttyrýǵa erekshe kóńil bólemiz. Bizdiń barlyq jobalarymyzdy iske asyrýdaǵy basymdyqtardyń biri – jergilikti qamtý máseleleri. Eger elimizde qajetti taýarlar nemese jabdyqtar óndirilmese, onda olardy jaqyn arada Qazaqstan aýmaǵynda lokalızasııalaý máselesin birlesip pysyqtaýdy usynamyz», dedi Oljas Bektenov Úkimettiń birlesken josparlardy iske asyrýda ashyq ári syndarly dıalogqa daıyn ekendigin rastaı otyryp.