Tasqynnan zardap shekken bilim berý mekemeleri men uıymdaryn qalpyna keltirý jumystaryna Úkimettiń tótenshe rezervinen qosymsha qarajat bólindi. Premer-mınıstr Oljas Bektenov tıisti qaýlyǵa qol qoıdy, dep habarlaıdy Egemen.kz Úkimettiń baspasóz qyzmetine silteme jasap.
Qalpyna keltirý jumystary Qostanaı, Aqmola, Aqtóbe oblystaryn qamtıdy. Bólingen qarajattyń jalpy somasy – 7,5 mlrd teńge. Atalǵan qarajat búlingen nysandardy qalpyna keltirýge, sondaı-aq qıraǵan nysandardyń ornyna jańa bilim berý mekemelerin salýǵa jumsalady.
Qostanaı oblysynda Jangeldın aýdanyndaǵy Aısa Nurmanov atyndaǵy mektep ǵımaratyn jóndeý josparlanǵan. Aqmola oblysy Atbasar qalasynda №1 mektep, Atbasar aýdany Sergeevka aýylynda «Esil» saýyqtyrý kesheni, sondaı-aq Derjavınsk qalasynda Abaı atyndaǵy mektep salynady. Aqtóbe oblysynda Kótibar batyr atyndaǵy mektep jáne Muǵaljar aýdanyndaǵy «Balaýsa» balabaqshasy, Oıyl aýdanyndaǵy «Balbóbek» mektep-baqshasy men balabaqshasy, Ekpetal mektebi qamtylady.
Bólingen qarajat jergilikti atqarýshy organdarǵa búlingen ǵımarattardy aldaǵy oqý jyly bastalǵanǵa deıin ýaqytyly qalpyna keltirýge múmkindik beredi. Aıta keteıik, bul bilim berý prosesiniń úzdiksiz júrgizilýin qamtamasyz etedi.