Elimizde sheteldik joǵary oqý oryndary, álemdik deńgeıdegi ýnıversıtetterdiń fılıaldary kóptep ashylyp jatyr. Bul úrdis joǵary bilimniń sapasyn arttyrý maqsatynda qolǵa alynǵan edi. Ǵylym jáne joǵary bilim mınıstrligi jaqynda taǵy bir jańa zertteý ýnıversıtetiniń qurylǵanyn habarlady.
Salalyq mınıstrliktiń habarlaýynsha, 2024 jyldyń 14 tamyzynda Ǵylym jáne joǵary bilim mınıstrligi men Cardiff University arasynda Astana qalasynda halyqaralyq deńgeıdegi zertteý ýnıversıtetin qurý týraly memorandýmǵa qol qoıyldy. Kardıff ýnıversıtetimen yntymaqtastyq – joǵary bilimdi transformasııalaýǵa, sapaly bilim berýdi damytýǵa jáne eldiń zertteý áleýetin kúsheıtýge baǵyttalǵan mańyzdy qadamdardyń biri. Kelissózge sáıkes, atalǵan sheteldik joǵary oqý orny jobanyń negizgi seriktesi retinde qatysady. Kardıff ýnıversıtetiniń halyqaralyq yntymaqtastyq jónindegi vıse-kansleri, professor Rýdolf Allemannyń aıtýynsha, bul baılanys Qazaqstan men Ulybrıtanııa arasyndaǵy joǵary bilim salasyndaǵy qarym-qatynasty jaqyndatady. Jobany júzege asyrý úshin Astana qalasynyń ákimdigi 10 ga jer bóldi. Jobany qoldaıtyn «Qualified Centre of Education Public Foundation» otandyq ınvestory ýnıversıtet ǵımaraty men qajetti ınfraqurylym salýdy qamtamasyz etedi.
Mınıstr S.Nurbek pen vıse-kansler, professor Vendı Lerner jáne departament dırektorlary arasyndaǵy kezdesýde Kardıff ýnıversıtetiniń ınjenerııa, jasandy ıntellekt, turaqty damý, medısına jáne bıotehnologııa sııaqty negizgi baǵyttar boıynsha bilim baǵdarlamalary men zertteý tehnologııalaryn júzege asyrý jóninde kelisimge qol jetkizildi. Jańa ýnıversıtetke stýdentterdi qabyldaý 2025 jyldyń qyrkúıek aıyna josparlanyp otyr.
Mınıstrlik taratqan aqparatyna súıensek, Cardiff University 1883 jyly qurylǵan, álemge tanymal akademııalyq jáne ǵylymı áleýetke ıe. Ýnıversıtet Ulybrıtanııanyń eń úzdik 25 oqý ornynyń qataryna kiredi, sondaı-aq Ulybrıtanııanyń jetekshi zertteý ýnıversıtetterin biriktiretin bedeldi «RussellGroup» tobynyń múshesi sanalady. Oqý orny medısına, bıologııa, ınjenerııa jáne áleýmettik ǵylymdar sııaqty baǵyttarda jetekshi ýnıversıtet retinde belgili. Ásirese onkologııa, kardıologııa jáne ınnovasııalyq tehnologııalar salasyndaǵy zertteýler erekshe oryn alady. Kardıff ýnıversıtetin tanymal tulǵalar, sonyń ishinde medısına salasyndaǵy Nobel syılyǵynyń laýreaty, professor ser Martın Evans, hımııa salasyndaǵy Nobel syılyǵynyń laýreaty professor Robert Hýber, Ulybrıtanııanyń Leıborıstik partııasynyń burynǵy kóshbasshysy jáne Eýropalyq komıssııanyń vıse-prezıdenti Nıl Kınnok, sondaı-aq BBC jańalyqtar júrgizýshisi Hıý Edvards támamdaǵan.