Fly Arystan jolaýshysy Astanada reısten keshigip qalǵannan keıin monıtordy ádeıi syndyrǵany úshin 73 myń teńge aıyppul arqalady, dep habarlaıdy Egemen.kz.
Onyń isi elordanyń mamandandyrylǵan aýdanaralyq ákimshilik quqyq buzýshylyqtar jónindegi sotynda qaraldy. Is materıaldary boıynsha, áıel Almaty halyqaralyq áýejaıynda áýe aılaǵynyń múlkin búldirgen.
Sot otyrysynda quqyq buzýshy óz kinásin tolyq moıyndap, jasaǵan isine ókinetinin bildirdi. Quqyq buzýshylyqtyń mán-jaıy ákimshilik quqyq buzýshylyq týraly hattamadaǵy faktilik derektermen, raportpen, túsiniktemelermen jáne beınejazbamen rastalady.
«ÁQBtK-niń 147-1-baby 1-bóliginiń sanksııasynda 20 AEK mólsherinde aıyppul salý nemese 5-ten 15 táýlikke deıin ákimshilik qamaýǵa alý kózdelgen. Sonymen qatar, ÁQBtK-niń 50-babyna sáıkes, júkti áıelder men 14 jasqa deıingi balalary bar áıelderge ákimshilik qamaýǵa alý qoldanylmaıdy. Jaýapkershilikti jeńildetetin jaǵdaılar retinde quqyq buzýshylyqtyń alǵash ret jasalýy, kináni moıyndaý jáne kámeletke tolmaǵan 3 balanyń bolýy eskerildi. Aýyrlatatyn jaǵdaılar anyqtalǵan joq. Sot qaýlysymen H. quqyq buzýshylyq jasaǵany úshin kináli dep tanylyp, 20 AEK mólsherinde aıyppul salyndy», – delingen habarlamada.
Sottyń qaýlysy zańdy kúshine engen joq.
Esterińizge sala keteıik, 19 tamyzda áýekompanııanyń SMS-habarlamasyndaǵy qateligine baılanysty jolaýshylar óz reısine keshigip kelgen. Áýekompanııa keshikken jolaýshylarǵa keltirilgen yńǵaısyzdyqty ótegen. Biraq másele janjalsyz bolmady. Oqıǵa ornyna polısııa qyzmetkerleri keldi.