Janýarlar zań boıynsha murager bola almaıdy. Degenmen bazbir baılar senimgerlik qorlar arqyly mıllıondaryn súıikti janýarlaryna qaldyryp júr eken.
Sonyń biri – záýlim qonaqúıdiń ıesi Leona Helmslı. 2007 jyly eki nemeresine eshteńe bermeı, ıtine 12 mıllıon dollar jazdyrǵan. Áp-sátte mıllıoner atanǵan Trabl atty ıttiń sýreti halyqaralyq basylymdarda jarııalandy. Halyq shýlap, Helmslıdiń bul isin túsine almady. Itti urlap ketý týraly oı qanshama adamǵa maza bermedi. Sodan keıin sýdıa aqyry ıttiń murasyn 2 mıllıon dollarǵa deıin qysqartty.
Tennıs oınaıtyn robot
Google ústel tennısin oınaıtyn robotty jetildirip, básekede jeńýdi úıretti.
Robot 29 oıyn oınap, 13 oıynshyny jeńgen. Jobany basqarǵan Pannag San-ketı – «Google DeepMind» kompanııasynyń aǵa baǵdarlamalyq ınjeneri. Júıeni durystaý úshin zertteýshiler ústel tennısi dobynyń kúıi, aınalýy, jyldamdyq jáne pozısııa sııaqty derekterdiń úlken kólemin jınaǵan. «Naqty álemdegi tapsyrmalarda adam deńgeıindegi jyldamdyq pen ónimdilikke jetý robottehnıka zertteý qaýymdastyǵy úshin basty maqsat bolyp qalady» dep jazylǵan zertteý maqalasynda.
XXII ǵasyrdyń kitaby
Jazýshylar tek XXII ǵasyrda oqýǵa bolatyn romandar jazyp jatyr.
Sýretshi Ketı Paterson Oslo ákimshiligimen birge 2014 jyly «Bolashaq kitaphanasy» art-jobasyn iske qosty. Jyl saıyn qazirgi jazýshylardyń birine 2114 jylǵa deıin oqýǵa bolmaıtyn roman jazý usynylady. Bolashaqta kitaptardy basyp shyǵarý úshin qoljazbalar saqtalatyn qoǵamdyq kitaphananyń janyna myń qaraǵaı otyrǵyzyldy. Tipti antologııany alýǵa bolatyn sertıfıkattar da satyldy. Jobaǵa arnalǵan romandaryn Margaret Atvýd, Devıd Mıtchell, basqa da tanymal avtorlar jazǵan.