Senat depýtattary, AES qurylysyn qoldaý jónindegi respýblıkalyq shtab músheleri Naýryzbaı Baıqadamov pen Rýslan Rústemov Qyzylorda oblysyna qarasty Shıeli aýdanyna sapary aıasynda aqsaqaldarmen kezdesip, AES salýdyń keleshegin talqylady, dep habarlaıdy Egemen.kz Senattyń baspasóz qyzmetine silteme jasap.
«Qazaqstannyń energetıka salasyn damytý shuǵyl sheshimderdi talap etip otyr. Atom energetıkasy - elimizdi energııamen qamtamasyz etý jáne onyń ekonomıkalyq turaqtylyǵyn qamtamasyz etý jolyndaǵy basty qadam. Qazaqstannyń damyǵan elder qataryna qosylýy úshin AES qajet. AES álemde qarqyndy túrde paıdalanylyp keledi jáne elimiz úshin eń jaqsy nusqany tańdaý – bizdiń mindetimiz», dedi depýtat N.Baıqadamov.
Ardagerler men aýdan turǵyndary Prezıdent Joldaýynda aıtylǵan bastamaǵa qoldaý bildirip, ózderin tolǵandyrǵan saýaldaryn qoıdy. Senatorlar aqsaqaldarmen kezdesýden keıin Turan aýyldyq okrýginiń turǵyndarymen pikirlesti.
Rýslan Rústemov tabıǵı gazdy jetkizýdegi turaqsyzdyq pen ony óndirýdiń qysqarýy jaǵdaıynda atom energetıkasy el ekonomıkasyn damytýdyń senimdi kózine aınalatynyn jetkizdi.
«AES qurylysy da jumys oryndaryn ashýǵa, jańa tehnologııany damytýǵa jáne elimizdiń turaqty energetıkalyq bolashaǵyn qamtamasyz etýge septigin tıgizedi. Bul ekonomıkany nyǵaıtyp qana qoımaı, elektr qýatynyń tapshylyǵyn sheshýdiń bir joly bolmaq», deıdi senator R. Rústemov.