Súmbile týmaı Ulannyń jazıra dalasyna tóselgen júz syrmaq kópshilikti eleń etkizdi. Munshama syrmaq neniń qurmetine tóseldi degen san saýalǵa saýyn aıtyp jatyrmyz dep jaýap qatty belgili týrıstik operator, kásipker Muhtar Toıbazarov. Sóıtsek, 12 qazanda bolatyn búrkitshiler festıvalin at shaptyrym aýmaqty almasa da, edáýir jerge jaıylǵan syrmaq ústinde otyryp habarlaǵan.
Mundaı habarlandyrýdan keıin Bozanbaı aýylynyń mańyndaǵy Búrkittóbede ótetin qusbegiler saıysyna asyǵatyndardyń qarasy kóp bolatyn sekildi. Basqasy basqa, oıy jańashyl, ıdeıasy erekshe kásipker júz syrmaqty qaıdan jınap aldy dep tańdanystyq. Babadan balaǵa mıras bolyp kele jatqan bekzat ónerdiń týyndysy syrmaqty mýzeıden kóretin kúnge jettik emes pe? Al, búgin tabıǵat aıasyna jaıyldy.
«Bul syrmaqtar oblystyń ár jerinen jınaldy. Shyǵystaǵy eń keremet, eń ádemi syrmaqtar deýge bolady. Mýzeı qorynan alynǵandary da, qolónershilerdiń kolleksııasynan alynǵandary da, jekelegen áýletten alynǵandary da bar. Kúzdiń bir ádemi, mızam shýaq tógilgen kúnin ádeıi tańdadyq. Birneshe júz metr polıetılen satyp alyp, syrmaqtyń astyna jaıdyq. Altaıdyń 100 syrmaǵy – barshańyzǵa saýyn aıtý. Jar salyp, «Shyǵys salbýryny» halyqtyq meıramyna shaqyrý», dedi qazaqtyń rýhanııatyn nasıhattap júrgen Muhtar Toıbazarov.
Qazaq halqynyń ǵajaıyp ónerin tamashalaýǵa kópshilik arnaıy bardy. Nemis, orys, belarýs, tatar, polıak, sheshen syndy ulttardyń ókilderi de kelip, qazaqtyń ónerimen tanysty.
Iá, saýyn aıtyldy. Endi 12 qazanda Bozanbaı kóginde qus samǵap, tulpar dúbiri estiledi.
Ulan aýdany,
Bozanbaı aýyly