Dástúrli túrde ótetin «Tech Orda» baǵdarlamasyna qatysýshylar sany jyl saıyn artyp keledi. Máselen, bıyl atalǵan jobaǵa qatysýǵa 35 764 ótinim túsken. Bul rekordtyq kórsetkish – qoǵam tarapynan jasandy ıntellekt pen IT-salasyna suranys joǵary ekeniniń birden-bir dáleli. Odan bólek, «Tomorrow School» jobasy da Ulttyq jasandy ıntellekt ortalyǵyn qurýdyń bastamasy bolmaq.
Memleket basshysy Joldaýynda keminde 100 myń IT-maman daıarlaý týraly aıta kelip, jas, bilimdi ári yntaly kadrlardy qalyptastyrý kerektigin atap ótken edi. Tapsyrmaǵa sáıkes Sıfrlyq damý, ınnovasııalar jáne aeroǵarysh ónerkásibi mınıstrligi «Astana Hub» halyqaralyq tehnoparkimen birlesip, 2021 jyly 20 myń IT-kadr daıarlaýdy kózdeıtin «Tech Orda» baǵdarlamasyn iske qosty. Osylaısha, memlekettiń qoldaýymen ár stýdentke 600 myń teńge bólinip, jyl saıyn 3 myńnan astam IT-maman oqytý josparlandy. Bul baǵdarlamanyń ereksheligi – elimizdiń 18 ben 45 jas aralyǵyndaǵy barlyq azamatyna jasandy ıntellekt múmkindikterin úıretip, IT-mamandyqty tegin oqytady.
Osy jyly «Tech Orda» baǵdarlamasyna 3465 grant bólindi, onyń ishinde 2465-i negizgi lekke, al 1000-y mamandandyrylǵan toptar aıasynda pedagogterge usynyldy. Atap aıtqanda, 300 grant mektep muǵalimderiniń jáne 700 grant joǵary oqý oryndaryndaǵy oqytýshylardyń biliktiligin arttyrýǵa berildi.
Baǵdarlamanyń 2022 jáne 2023 jyldardaǵy nátıjeleri bilikti kadrlardy daıarlaýdaǵy mańyzyn rastaıdy. Búginde 91 mektep 6251 stýdentti oqytty. Jobaǵa iri qalalardyń turǵyndary ǵana emes, óńir turǵyndary da belsendi qatysyp jatyr. Naqtyraq aıtsaq, stýdentterdiń 46%-y elimizdiń túrli aımaǵynan jınalǵan. Bul IT-bilimdi ulttyq deńgeıde damytýǵa yqpal etedi.
Bıyl 79 otandyq IT-mektep pen 1 IT-kompanııa akkredıtteýden ótip, veb-baǵdarlama ázirleý, 3D-dızaın men 3D AR/VR qosymshalar, kıberqaýipsizdik pen IoT, jasandy ıntellekt, mobıldi qosymshalar jasaý, sondaı-aq «Big Data» men «GameDev» sııaqty ózekti baǵyttar qamtylǵan 178 kýrs boıynsha mamandar daıarlaý múmkindigine ıe boldy.
Statıstıkaǵa súıensek, «Tech Orda» túlekteriniń 88%-y jumysqa ornalasqan. Sonyń ishinde «Kaspi.kz», «Halyk Bank», «KPMG», «Ernst&Young», «Teńizshevroıl», «QazMunaıGaz», «Freedom Finance», «Kcell», «Air Astana», «Kolesa Group» sııaqty iri kompanııalarda qyzmet atqarady.
Al «Tomorrow School» – Nıkolas Sadırak ázirlegen «01 Edu» platformasynda ınnovasııalyq «peer-to-peer» oqytý júıesin paıdalanatyn biregeı jasandy ıntellekt mektebi. Atalǵan mektep baǵdarlamalaý daǵdylaryn nólden bastap úıretedi. Mundaǵy oqytý stýdentterdiń ózara kómegi men toptyq jumysyna negizdelgen, ıaǵnı muǵalimder men dástúrli sabaqtar bolmaıdy. Odan bólek, barlyq stýdenttiń Astana qalasyndaǵy «Astana Hub» tehnoparki alańynda oflaın formatta tegin oqý múmkindigi bar. Mektep táýlik boıy (24/7) jumys isteıdi, stýdentter ózderine yńǵaıly oqý kestesin qurady.
Irikteý úmitkerlerdiń logıkalyq oılaý deńgeıin tekseretin 2 onlaın oıynnan jáne «basseın» dep atalatyn oqytýdyń kirispe kezeńine tikeleı qatysýdy kózdeıtin bólimnen turady. Birinshi «basseın» 17 qarashaǵa deıin ótedi, munda qatysýshylar baǵdarlamalaý álemine tereńirek boılap, oqýdy jalǵastyrý úshin óz múmkindigin baǵalaıdy. Irikteýden ótkennen keıin qatysýshylar 18 aılyq negizgi oqytýǵa kóshedi. Bul kezeńde olar 50-den astam jobany júzege asyryp, «Golang», «Rust», «JavaScript», «Python» jáne basqa da 20-dan astam baǵdarlamalaý tilin meńgeredi. Sońǵy kezeńde qatysýshylar JI-ınjeneri, baǵdarlamalyq qamtamasyz etýdi daıyndaýshy, mobıldi qosymshalar ázirleýshisi, DevOps ınjeneri, IT júıeleriniń sáýletshisi, kıberqaýipsizdik mamany jáne beıneoıyndar ázirleýshisi syndy mamandyqtardyń birin tańdaıdy.