Qarjylyq monıtorıng agenttiginiń Almaty oblysy boıynsha departamenti oblystyq prokýratýramen birlesip, «Shańyraq» qoǵamdyq birlestiginiń basshysy A.Sadyrbaıdyń alaıaqtyq áreketin áshkerelegen, dep habarlaıdy Egemen.kz Qarjylyq monıtorıng agenttiginiń baspasóz qyzmetine silteme jasap.
A.Sadyrbaı basqaratyn adamdar toby Balqash, Eńbekshiqazaq, Kegen, Raıymbek jáne Uıǵyr aýdandarynda jalǵan aýyl sharýashylyǵy kooperatıvterin qurdy degen kúdikke ilingen.
«Negizgi maqsat - usaq maldyń analyq basyn uryqtandyrýǵa sýbsıdııalardy zańsyz alý jáne jemshóp shyǵyndaryn óteý. Bul úshin zańnamaǵa qaıshy aýylsharýashylyq jerleri joq sharýa qojalyqtary tartyldy. Budan ári jalǵan kadastrlyq nómirlerdi kórsete otyryp, dáıeksiz málimetterdi qamtıtyn sýbsıdııalar alýǵa ótinimder qashyqtan berildi», delingen habarlamada.Bul rette aýyl sharýashylyǵy kooperatıvteri basshylaryn habardar etpeı, olardyń ESQ-sy paıdalanyp, 1,2 mlrd teńgeden astam qarajat urlanǵany anyqtalǵan.
Qazirgi tańda A.Sadyrbaı ustalyp, onyń sybaılasy tergeý sotynyń sanksııasymen úı qamaýyna alynǵan.