Ǵalam ǵajaptary: Mıllıonerler aýyly

Bul – Qytaıdaǵy Szıansý provın­sııa­syndaǵy Hýası aýyly. Hýası – Qytaıda al­ǵashqylardyń biri bolyp qor bırjasyna aksııa shyǵarǵan aýyl. Sondaı-aq aýyldyń jekemenshik ushaqtary men tikushaqtary bar. Bul aýyldaǵy eń erekshe ǵımarat – 74 qabattan turatyn, bıiktigi 328 metr Lýn Sı halyqaralyq qonaqúıi. Ony Hýası turǵyndary óz qarjysyna salǵan. Qonaqúı Qytaıdaǵy eń bıik ǵımarattar arasynda segizinshi orynǵa ıe.

Mahabbat qudireti

Úndistan fermeri Dashrath Manjhı óz qolymen taýdy tesip, 22 jyl boıy tonnel qazǵan. Onyń bul qa­damǵa barýyna súıikti jarynyń qaıǵyly ólimi sebep bolǵan.

Dashrath Manjhı áıelimen birge Úndistannyń Gaı qalasynyń mańyndaǵy shaǵyn aýylda ómir súrgen. Qarapaıym sharýalar sekildi olardyń da turmysy nashar bolady. Bir kúni áıeli aýyr syr­qatqa shaldyǵady. Jedel járdem shaqyrǵanymen, ol 70 shaqyrymdyq taý jolyn aınalyp ótetindikten, dárigerler ýaqytynda jete almaıdy. Sóıtip áıeli qaıtys bolady. Súıikti jarynyń ólimi fermerdiń ómirin túbegeıli ózgertedi. Áıelin qutqara almaǵanyna qatty qınalǵan Dashrath taýdan tonnel qazýǵa bel býady. Onyń maqsaty – qalaǵa tez jetkizetin týra jol salý. Ol 1960 jyldan bastap 22 jyl boıy adam aıtqysyz eńbek pen tabandylyqtyń arqasynda úkimettiń qolynan kelmegen isti júzege asyrdy.

Ushatyn avtobýs

Qytaıdyń ushatyn avtobýs jobasy – fýtýrıstik kólik júıesiniń jańa bir kezeńi. Ol qala ishinde kólik qozǵalysyn túbegeıli ózgertýge múmkindik beredi.

Qytaıdyń «Xpeng», «EHang» kompanııa­lary ushatyn avtobýs jobasyn jasap jatyr. Jobanyń basty maqsaty – qaladaǵy kólik keptelisin azaıtý. Ushatyn avtobýs kólikteriniń áýege kóterilýi úshin arnaıy elektrli júıeler men joǵary tehnologııaly qozǵaltqyshtar qoldanylady. Bul ushatyn avtobýstar tolyq elektrmen jumys isteıtin kólik túri bolmaq. Sonymen qatar avtobýstardyń jyldamdyǵy dás­túrli kólikterge qaraǵanda, birneshe ese joǵary. Eger bul joba sátti iske assa, ol bolashaqtaǵy kólik ındýstrııasynyń negizgi damý baǵytyna aınalýy bek múmkin.