Mahabbat – bárin ózgerte alatyn qudiretti sezim. Oǵan dálel bolatyn taǵdyrlar da bar.
Bir kúni Tomas Edıson mektepten úıine qaıtyp kelip, muǵalimniń hatyn anasyna beredi. Anasy hatty oqyp, kózine jas alyp, ulyna: «Sizdiń ulyńyz – danyshpan. Bul mektep tym kishkentaı. Munda balańyzdy oqyta alatyn muǵalimder joq. Ony ózińiz oqytýyńyzdy ótinemiz», dep jazylǵanyn jetkizedi. Kóp jyl ótip, anasy qaıtys bolǵannan keıin Edıson álemge áıgili ónertapqyshqa aınalǵan kezinde, otbasylyq arhıvti aqtaryp otyryp, sol hatty taýyp alady. Hatty ashyp oqyǵanda, onda bylaı dep jazylǵanyn kóredi: «Sizdiń ulyńyzdyń aqyl-oıy kem. Biz ony basqa oqýshylarmen birge oqyta almaımyz. Sondyqtan ony úıde ózińiz oqytqanyńyz jón». Edıson birneshe saǵat boıy jylap, keıin kúndeligine: «Tomas Alva Edıson aqyl-oıy kem bala bolǵan. Biraq óziniń batyr anasynyń arqasynda ol zamanynyń eń uly danyshpanyna aınaldy», dep jazady.
Eń kóp shaıpul
Baǵyń jansa, mıllıoner bolý bir-aq sát. Máselen, Fıllıs Penzo sııaqty daıashy bolyp júrip baıyp ketýiń ábden múmkin.
Robert Kannıngem kóp jyl boıy «Sal’s Pizzeria» pısserııasynyń turaqty tutynýshysy bolady. Meıramhanaǵa kelgen saıyn oǵan Fıllıs Penzo atty daıashy qyzmet kórsetip kelgen. Birde Robert Fıllıske shaıpul berýdiń ornyna, lotereıa bıletindegi sandardy birge tańdaýǵa usynys tastaǵan. Eger utsa, teń jartysyn shaıpul retinde berýge ýáde beredi. Birneshe kúnnen keıin Robert 6 mıllıon dollar utqanyn bilip, Fıllıske qońyraý shalyp, oǵan 3 mıllıon dollar beretinin aıtqan. Osy oqıǵany estigen utys kompanııasy olarǵa 21 jyl boıy jyl saıyn 285 715 dollar tólep otyrǵan eken. Tipti 1984 jyly shynaıy oqıǵaǵa negizdelgen fılm de túsirilgen.
Sýperkompıýter
AQSh-tyń Loýrens ulttyq zerthanasy El Capitan sýperkompıýterin tanystyrdy. Bul qurylǵy bir sekýndta 1,7 kvıntıllıon operasııa oryndap, Frontier men Aurora sýperkompıýterlerin artta qaldyrdy.
«Hewlett Packard Enterprise» pen «AMD» kompanııalary birlesip jasaǵan El Capitan – álemdegi úshinshi sýperkompıýter. Ol ekzaflops deńgeıinde esepteýler júrgizýge múmkindik beredi. Iаǵnı bir sekýndta kvıntıllıonnan artyq operasııa oryndaıdy. Onyń ónimdiligi aldyńǵy sýperkompıýterdiń múmkindiginen 20 ese artyq. Bul degenimiz – birneshe aıǵa sozylǵan esepteýlerdi endi birneshe saǵatta oryndaýǵa bolady degen sóz. Sýperkompıýter 11 000 esepteý túıinimen jabdyqtalǵan, jady 5,4 petabaıtty quraıdy.