«Aqtóbe-Oral-Reseı shekarasy» tas jolynyń ýchaskesinde («Syrym» ótkizý pýnkti) qaıta jóndeý jumystary júrgiziledi, dep habarlaıdy Egemen.kz «QazAvtoJoldyń» baspasóz qyzmetine silteme jasap.
Vedomstvonyń habarlaýynsha, 2025 jylǵy 12 aqpannan bastap atalǵan avtojoldyń 263-265 shaqyrym aralyǵyndaǵy ýchaskesinde kólik aıryǵynyń qaıta jańartý jumystaryna baılanysty qozǵalysqa shekteý qoıylady.
«Batys Qazaqstan oblysynda respýblıkalyq mańyzy bar «Podstepnoe - Fedorovka - RF shekarasy» avtojolynyń 0-36 shaqyrym aralyǵynda qaıta jańartý jobasy júzege asyp jatyr. Bul jol «Aqtóbe - Oral - RF shekarasy» avtojolymen janasady. Joba boıynsha qurylys jumystaryn júrgizip jatqan merdiger «bede japyraǵy» ádisimen kólik aıryǵyn soǵý jáne úıindi men ótpejoldy salý boıynsha negizgi jumystardy bastaıdy», delingen habarlamada.
Sonymen qatar, ótpejoldyń tirek bólikterin ornatýǵa baılanysty «Aqtóbe - Oral - RF shekarasy (Syrym ótkizý pýnkti)» avtojolynyń 263-265 shaqyrym aralyǵyndaǵy uzyndyǵy 1,5 shaqyrym ýchaskesi, sondaı-aq Atyraý baǵytyndaǵy jol qıylysy ýaqytsha jabylady. Qozǵalys negizgi avtojoldyń sol jaǵyndaǵy ýaqytsha aınalma jol (uzyndyǵy 2,2 shaqyrym) arqyly júzege asatyn bolady.