QMA Qyzylorda oblysy boıynsha departamenti tergegen «Qnet» qarjy pıramıdasynyń qurylymdyq bólimshesin uıymdastyrǵandarǵa sot úkimi shyqty, dep habarlaıdy Egemen.kz.
Kúdiktiler azamattardy kóp deńgeıli marketıngtik jeli men elektrondy kommersııaǵa ınvestısııa salýǵa, onyń ishinde jalǵan «QVI tripsaver» saıahat kartalaryn jáne zergerlik buıymdardy satyp alýǵa úgittegen. Oǵan qosa 840 myńnan 4 mln teńgege deıin salǵan salymshylardan basqa qatysýshylardy tartý talap etilgen. Nátıjesinde qarjy pıramıdasyna 51 adam salǵan qarjy 63 mıllıon teńgeden asypty.
Sot sheshimimen pıramıda uıymdastyrýshylary kináli dep tanylyp, olarǵa 6-7 jylǵa deıin bas bostandyǵynan aıyrý jazasy taǵaıyndaldy. Sot sheshimimen Astana qalasynan jalpy quny 301 mıllıon bolatyn 7 páter jáne «Toyota Camry» avtokóligi tárkilendi.