Tarazdaǵa Dostyq úıinde Qazaqstan halqy Assambleıasynyń 30 jyldyq mereıtoıyna oraı «Meniń álemim» atty sýretshiler men qolóner sheberleriniń kórmesi ótti, dep habarlaıdy Egemen.kz.
Kórmeniń ashylý saltanatyna Torri ART jáne «Mereı» shyǵarmashylyq stýdııasy men «Výnderkınd» balalardy damytý ortalyǵynyń tárbıelenýshileri, Taraz qalasyndaǵy fızıka-matematıkalyq baǵyttaǵy Nazarbaev Zııatkerlik mektebi, sondaı-aq tehnıkalyq shyǵarmashylyq, mektep olımpıadalaryn jáne mektepten tys is-sharalardy ótkizetin oblystyq ortalyqtardyń oqýshylary men qala turǵyndary qatysty. Budan bólek, Aleksandr Pýshkın atyndaǵy №40 jáne №41 gımnazııalar, №42 jáne №66 Taraz mektepteri, Amangeldi aýylynyń orta mektepteriniń oqýshylary da kórmeniń ótýine atsalysty.
Is-sharany oblystyq aqparat jáne qoǵamdyq damý basqarmasynyń «Qoǵamdyq kelisim» KMM basshysy Múbárak Jınaqbaeva quttyqtaý sózimen ashyp, kórme jumysyna sáttilik tiledi.
Balalar men jasóspirimderdiń shyǵarmashylyq qyzmetin qoldaý jáne nasıhattaý, olardyń eńbegin kórsetý arqyly shyǵarmashylyq jáne tulǵalyq damýyna yqpal etý maqsatynda uıymdastyrylǵan is-sharada keramıst-sýretshi, oblystyq qolónershiler odaǵynyń múshesi, Taraz qalasyndaǵy «Art Taraz» sýretshiler odaǵynyń múshesi Indıra Gýbasheva men №40 gımnazııanyń kórkem eńbek páni muǵalimi Tatıana Votınseva kórmeniń ashylýyna izgi tilekterin bildirip, mundaǵy týyndylardyń mańyzdylyǵyna toqtaldy.
Kórmege 5-16 jas aralyǵyndaǵy oblysymyzdyń 130-dan asa jas sýretshi men qolónershiniń 200-ge jýyq shyǵarmashylyq týyndylary qoıyldy. Olardyń arasynda múmkindigi shekteýli balalardyń da eńbekteri bar.
Is-shara barysynda Múbárak Jınaqbaeva qatysýshylardyń eńbekterin joǵary baǵalap, jas talanttarǵa Alǵys hattar tabystady. Saltanatty jıyn kórme zalynyń meńgerýshisi Jazıra Shildebaevanyń qonaqtardy kórme jumystarymen tanystyrýymen aıaqtaldy.
Taraz